ڈیرہ اسماعیل خان پولیس ٹریننگ سکول پر حملہ آور تمام خوارج انجام کو پہنچ گئے‘ آپریشن مکمل

ڈیرہ اسماعیل خان ( اُردو پوائنٹ اخبارتازہ ترین۔ 11 اکتوبر2025ء ) خیبرپختونخواہ پولیس اور سکیورٹی فورسز نے پولیس ٹریننگ سکول ڈیرہ اسماعیل خان پر حملہ آور خودکش بمبار سمیت تمام 6 دہشت گردوں کو ہلاک کردیا، واقعے میں شہید جوانوں کی تعداد 7 ہوگئی اور 13 اہلکار زخمی ہوئے۔ محکمہ انسداد دہشت گردی (سی ٹی ڈی) کے مطابق ڈیرہ اسماعیل خان کے علاقے رتہ کلاچی میں واقع پولیس ٹریننگ سکول پر فتنہ الخوارج کے دہشتگردوں نے رات گئے بھاری ہتھیاروں سے حملہ کیا، سکول کی سکیورٹی پر مامور پولیس جوانوں نے فوری اور بھرپور جوابی کارروائی کرتے ہوئے دہشت گردوں کے مذموم عزائم کو خاک میں ملا دیا، جس پر خوارج نے بارود سے بھرا ٹرک پولیس ٹریننگ سکول کے گیٹ سے ٹکرا دیا جس سے سکول کی دیوار گر گئی اور سکیورٹی پر مامور ایک جوان ملبے تلے دب کر شہید ہوگیا۔

(جاری ہے)

بتایا گیا ہے کہ مختلف یونیفارمز میں ملبوس دہشت گرد سکول کے اندر داخل ہوئے اور بھاری ہتھیاروں سے فائرنگ شروع کردی، جس پر سکیورٹی پر مامور ایک اور جوان نے بہادری سے جوابی کارروائی کا آغاز کیا تو دہشت گرد دستی بموں سے حملہ آور ہوئے جس سے وہ جوان جام شہادت نوش کرگیا، جس کے بعد پولیس اور خوارج کے درمیان فائرنگ کا تبادلہ کئی گھنٹے جاری رہا اور خوارج مسلسل دستی بم پھینکتے رہے، خوارج نے پولیس ٹریننگ سینٹر کے قریب واقعے نادرا سینٹر کو بھی آگ لگادی۔

معلوم ہوا ہے کہ حملے کی اطلاع ملتے ہی ڈی پی او صاحبزادہ سجاد احمد اور آر پی او سید اشفاق انور پولیس کی بھاری نفری کے ہمراہ فی الفور موقع پر پہنچ گئے، آپریشن کے دوران ٹریننگ سینٹر میں موجود تمام زیر تربیت ریکروٹس کو بحفاظت محفوظ مقام پر منتقل کرکے ایک بڑے سانحے سے بچا لیا گیا، پولیس اور دیگر سکیورٹی فورسز نے مشترکہ طور پر 5 گھنٹے طویل آپریشن میں جرات و بہادری کی مثال قائم کرتے ہوئے 6 دہشت گردوں کو جہنم واصل کیا، دہشت گردوں کے قبضہ سے خودکش جیکٹس، بارودی مواد، اسلحہ اور ایمونیشن برآمد کرلیا گیا تاہم دہشتگردوں سے مقابلے میں 7 اہلکاروں نے جام شہادت نوش کیا، 13 اہلکار زخمی ہوئے جنہیں طبی امداد کیلئے ہسپتال منتقل کردیا گیا۔

ترجمان سی ٹی ڈی نے بتایا کہ شہداء میں کانسٹیبل مدثر، کانسٹیبل جلال، دانیال، لانگری عصمت اللہ، کانسٹیبل انور، ریکروٹ کانسٹیبل فرحان اللہ اور لیویز کی کوہاٹ پلاٹون کا نامعلوم ہیڈ کانسٹیبل شامل ہے، زخمیوں میں کانسٹیبل نصیر محمد، کانسٹیبل محمد شعیب، کانسٹیبل حضرت علی، کانسٹیبل یعقوب، کانسٹیبل سلیم، کانسٹیبل صدام حسین، سعید الرحمٰن، کانسٹیبل امان اللہ ، کانسٹیبل عبداللہ، ریکروٹ کانسٹیبل مدثر، عصمت عباس، ریکروٹ کانسٹیبل یاسر اور ریکروٹ کانسٹیبل اعجاز احمد شامل ہیں۔

ڈی پی او ڈیرہ اسماعیل خان کا کہنا ہے کہ ٹریننگ سکول میں ٹریننی اور اساتذہ و اسٹاف سمیت 200 کے قریب افراد موجود تھے جنہیں ریسکیو کرلیا گیا جب کہ آئی جی خیبر پختونخواہ پولیس ذوالفقار حمید نے آر پی او سید اشفاق انور اور ڈی پی او صاحبزادہ سجاد احمد کی قیادت میں ڈیرہ اسماعیل خان پولیس کی بروقت اور کامیاب کارروائی کو سراہتے ہوئے کہا کہ افسران کی فرنٹ لائن پر موجودگی اور جوانوں کی بے مثال بہادری نے ثابت کردیا کہ خیبر پختونخواہ پولیس دہشتگردی کے خاتمے کے لیے پرعزم ہے۔