Live Updates

تحریکِ انصاف کی سعد رضوی کی اہلیہ، بیٹی و دیگر خواتین کی گرفتاری کی مذمت

یہ اقدام چادر و چار دیواری کے تقدس کی کھلی پامالی اور انسانی حقوق کی سنگین خلاف ورزی ہے، ہر اس پاکستانی کے ساتھ کھڑے ہیں جو آئینی و قانونی طور پر پُرامن احتجاج کا حق رکھتا ہے؛ پارٹی ترجمان

ساجد علی ہفتہ 11 اکتوبر 2025 15:54

تحریکِ انصاف کی سعد رضوی کی اہلیہ، بیٹی و دیگر خواتین کی گرفتاری کی ..

لاہور ( اُردو پوائنٹ اخبارتازہ ترین۔ 11 اکتوبر2025ء ) پاکستان تحریکِ انصاف نے مذہبی جماعت تحریک لبیک کے سربراہ سعد رضوی کی اہلیہ، کمسن بیٹی اور دیگر باپردہ خواتین کی گرفتاری کی مذمت کردی۔ سیکریٹری اطلاعات پی ٹی آئی شیخ وقاص اکرم کے مطابق پاکستان تحریکِ انصاف تحریک لبیک کے سعد رضوی کی اہلیہ، کمسن بیٹی اور باپردہ خواتین کی گرفتاری کی مذمت کرتی ہے، یہ اقدام چادر اور چار دیواری کے تقدس کی کھلی پامالی اور انسانی حقوق کی سنگین خلاف ورزی ہے، کل اِسی ظلم کا نشانہ عمران خان کی اہلیہ، بہنیں اور تحریک انصاف کی خواتین اور کارکنان تھیں۔

ان کا کہنا ہے کہ جب پاکستان تحریکِ انصاف کی خواتین اور نوجوان بھیانک ریاستی تشدد کا شکار بنے تو کوئی ان کی حمایت میں کھڑا نہ ہوا لیکن اس کے باوجود ہم کسی بھی پاکستانی شہری پر بیہمانہ تشدد اور چادر و چار دیواری کے تقدس کی پامالی کی مذمت کرتے ہیں، پاکستان تحریکِ انصاف ہر اس پاکستانی شہری کے ساتھ کھڑی ہے جو آئینی اور قانونی طور پر پرامن احتجاج کا حق رکھتا ہے۔

(جاری ہے)

یاد رہے کہ تحریک لبیک کے کارکنان اور رہنماء سعد حسین رضوی کی قیادت میں ٹی ایل پی کا لاہور میں جماعت کے مرکز مسجد رحمت العالمین ﷺ سے شروع ہونے والا لانگ مارچ اسلام آباد کی جانب رواں دواں ہے، ٹی ایل پی کے سربراہ نے اعلان کیا کہ ہم لاہور سے اسلام آباد امریکی سفارتخانے تک لانگ مارچ کریں گے، آپ ٹرمپ سے کون سا ہاتھ ملا کر آئے ہیں کہ پاکستان میں فلسطین کے حق میں بات بھی نہیں کرنے دے رہے؟۔

ان کا کہنا تھا کہ اس مارچ میں میں خود سب سے آگے چلوں گا، اس کے بعد ہماری جماعت کی شوریٰ اور پھر کارکنان پیش قدمی کریں گے، گرفتاری، گولی اور شیل کوئی مسئلہ نہیں ہیں، شہادت ہمارا مقدر ہے، اگر آپ کے لیے سفارتخانے مقدس ہیں تو ہمارے لیے بیت المقدس افضل ہے، اپنے مال، اپنے خون اور اپنی اولاد سے بھی بیت المقدس ہمیں افضل ہے، جماعت نے کوئی پہل نہیں کی مگر ناموسِ رسالت کے دفاع کے لیے اور اس مرتبہ بیت المقدس کے سبب قدم اٹھایا گیا، امتِ مسلمہ میں ابھی بھی ایسے نوجوان موجود ہیں جو قربانی کے لیے تیار ہیں۔