پاکستان، ترکیہ اور آذربائیجان کے اسپیکرز کا تیسرا سہ فریقی اجلاس 12 سے 14 اکتوبر کو اسلام آباد میں ہوگا

اسلام آباد (اُردو پوائنٹ اخبارتازہ ترین - اے پی پی۔ 11 اکتوبر2025ء) اسپیکر قومی اسمبلی سردار ایاز صادق کی قیادت میں قومی اسمبلی سیکرٹریٹ 12 سے 14 اکتوبر 2025 تک پاکستان، ترکیہ اور آذربائیجان کے اسپیکرز کے تیسرے سہ فریقی اجلاس کی میزبانی کرے گی۔ اجلاس میں برادر ممالک کے مابین پارلیمانی تعاون کو فروغ دینے اور خطے میں پائیدار امن، استحکام اور اجتماعی خوشحالی کے فروغ پر غور و خوض کیا جائے گا۔

ہفتہ کوقومی اسمبلی سیکرٹریٹ سے جاری بیان کے مطابق اجلاس میں اسپیکر قومی اسمبلی سردار ایاز صادق کے علاوہ گرینڈ نیشنل اسمبلی آف ترکیہ کے اسپیکر نعمان کورتولموش، آذربائیجان کی ملی مجلس کی اسپیکر محترمہ غفارووا اپنے اپنے پارلیمانی وفود کے ہمراہ شرکت کریں گے۔یہ سہ فریقی اجلاس تینوں ممالک کے مابین جاری پارلیمانی مکالمے اور ادارہ جاتی تعاون کو فروغ دینے کے سلسلے کی کڑی ہے۔

(جاری ہے)

اس سلسلے کا آغاز 2021 میں آذربائیجان کے دارالحکومت باکو سے ہواجہاں پہلا سہ فریقی اجلاس منعقد ہوا جس میں پارلیمانی تعاون کی بنیاد رکھی گئی۔ دوسرا اجلاس 2022 میں ترکیہ کے شہر استنبول میں منعقد ہوا، جس میں تینوں ممالک کے درمیان پارلیمانی و ادارہ جاتی روابط کو مستحکم بنانے پر اتفاق کیا گیا۔اسلام آباد میں ہونے والا حالیہ اجلاس ماضی کی کوششوں کے تسلسل کو آگے بڑھاتے ہوئے، تینوں ممالک کے مابین پارلیمانی تعلقات کو مزید مستحکم بنانے اور علاقائی و عالمی چیلنجز سے نمٹنے کے لیے مشترکہ حکمتِ عملی وضع کرنے پر مرکوز ہوگا۔

اجلاس میں متعدد اہم موضوعات پر تبادلہ خیال کیا جائے گاجن میں موسمیاتی تبدیلی کے اثرات، پائیدار ترقی کے اہداف، قدرتی آفات سے نمٹنے کی صلاحیت میں بہتری، علاقائی سالمیت اور خودمختاری کے تحفظ، بیرونی خطرات کے نمٹنے کیلئے یکجہتی، اور عوامی و ثقافتی روابط کے فروغ دینے جیسے امور شامل ہیں۔پاکستان، ترکیہ اور آذربائیجان کے اسپیکرز کا حالیہ اجلاس پاکستان کی پارلیمانی سفارت کاری کے اس وژن کا عکاس ہے جو خطے میں امن، تعاون اور ترقی کے فروغ پر مبنی ہے۔

توقع کی جارہی ہے کہ پاکستان، ترکیہ اور آذربائیجان کے درمیان دوستی، باہمی اعتماد اور مشترکہ اہداف پر مبنی یہ اجلاس ایک پُرامن، مستحکم اور خوشحال خطے کے قیام کی جانب ایک اہم سنگِ میل ثابت ہوگا۔اجلاس کے آغاز سے قبل تینوں ممالک کے اسپیکرز کی ایگزیکٹو میٹنگ منعقد ہوگی، جس میں اجلاس کے حتمی ایجنڈے کی منظوری دی جائے گی اور گزشتہ اجلاسوں میں طے پانے والے فیصلوں پر عملدرآمد کا جائزہ لیا جائے گا۔

افتتاحی اجلاس سے اسپیکر قومی اسمبلی سردار ایاز صادق، اسپیکر گرینڈ نیشنل اسمبلی آف ترکیہ نعمان کورتولموش، اور اسپیکر ملی مجلسِ آذربائیجان محترمہ غفارووا خطاب کریں گے۔ اجلاس کے اختتام پر تینوں ممالک کے اسپیکرز کی مشاورت سے "اسلام آباد اعلامیہ" کی منظوری دی جائے گی، جو سہ فریقی پارلیمانی تعاون کو نئی سمت دینے میں سنگِ میل ثابت ہوگا۔اسپیکرز اور اُن کے پارلیمانی وفود لاہور کا دورہ بھی کریں گے اور عظیم مفکر و شاعر، علامہ محمد اقبال کے مزار پر پھولوں کی چادر چڑھائیں گے۔