سپریم کورٹ بار ایسوسی ایشن کے انتخابات کیلئے امیدواروں کی سرگرمیاں عروج پر پہنچ گئیں، پولنگ 16 اکتوبر کو ہوگی

اتوار 12 اکتوبر 2025 19:20

لاہور (اُردو پوائنٹ اخبارتازہ ترین - اے پی پی۔ 12 اکتوبر2025ء) سپریم کورٹ بار ایسوسی ایشن کے انتخابات کے سلسلے میں امیدواروں کی سرگرمیاں عروج پر پہنچ گئیں انتخابی دنگل 16اکتوبر کو ہوگا ،بار کی 13 نشستوں پر ملک بھر سے 34 امیدوار مدمقابل ہیں۔ روایتی حریف انڈیپنڈنٹ گروپ اور پروفیشنل گروپ کے حمایت یافتہ امیدواروں کے درمیان سخت مقابلہ متوقع ہے ۔

صدارت کیلئے عاصمہ جہانگیرگروپ کے ایڈوکیٹ ہارون الرشید اور حامد خان گروپ کے ایڈووکیٹ توفیق آصف کے درمیان ون ٹو ون مقابلہ ہوگا۔ سیکرٹری کے عہدے کیلئے میاں عرفان اکرم اور ملک زاہد اسلم اعوان مدمقابل ہیں ۔ایڈیشنل سیکرٹری کے لیے قاضی غلام دستگیر اور سردار طارق حسین کے درمیان سخت مقابلہ متوقع ہے، فنانس سیکرٹری عہدے پر ایڈووکیٹ تنویر چوہدری اور سائرہ خالد راجپوت مد مقابل ہوں گےجبکہ نائب صدر ( پنجاب) کی نشست پر محمد حبیب قریشی، چوہدری ارشد حسین اور خالد مسعود سندھو کے درمیان کانٹے کا مقابلہ متوقع ہے۔

(جاری ہے)

دیگرامیدواروں میں نائب صدر بلوچستان کیلئے ایڈووکیٹ لیاقت علی ترین، رحمت اللہ صدوزئی،نائب صدر کے پی کیلئے فضل شاہ محمود اور حبیب قریشی،نائب صدر سندھ ملک خوشحال خان اور محمد لطف اللہ آرائیں شامل ہیں ۔ملک بھر سے 4 ہزار 379 وکلا ووٹ کاسٹ کریں گے لاہور سے 1 ہزار 460 وکلا اپنا حق رائے دہی استعمال کریں گے جبکہ ملتان 315، بہاولپور 145، راولپنڈی 805، خیبرپختونخوا 593، سندھ 741 اور بلوچستان سے 322 وکلا اپنا حق رائے دہی استعمال کریں گے۔\395