پاک آرمی کی ٹیم نےبرطانیہ میں منعقدہ کیمبرین پیٹرول مشق - 2025 میں گولڈ میڈل حاصل کرلیا

پیر 13 اکتوبر 2025 12:37

اسلام آباد (اُردو پوائنٹ اخبارتازہ ترین - اے پی پی۔ 13 اکتوبر2025ء) پاک آرمی کی ٹیم نےبرطانیہ میں منعقدہ کیمبرین پیٹرول مشق - 2025 میں گولڈ میڈل حاصل کیا ہے ۔ پیر کو پاک فوج کے شعبہ تعلقات عامہ (آئی ایس پی آر )سے جاری بیان کے مطابق پاکستان آرمی کی ٹیم نے 03 سے 13 اکتوبر 2025 تک ویلز برطانیہ میں منعقد ہونے والی ایکسرسائز کیمبرین پیٹرول - 2025 میں گولڈ میڈل حاصل کیا ۔

یہ ایکسرسائز کیمبرین پیٹرول 66 سال سے منعقد کی جارہی ہے، مشق میں پیشہ ورانہ معیار کو برقرار رکھا گیا ۔

(جاری ہے)

پوری دنیا سے مشق کے شرکا کو نا ہموار علاقے میں حکمت عملی کے ساتھ آگے بڑھنا پڑا، 48 گھنٹوں کے دوران 60 کلومیٹر کا فاصلہ طے کرتے ہوئے انہوں نے مسابقتی ماحول میں ماہرانہ انداز میں اپنے اہداف حاصل کئے۔ رواں سال مشق میں 36 ممالک کی 137 ٹیموں نے حصہ لیا اور ان تمام ٹیموں میں سے کیپٹن محمد سعد کی قیادت میں پاک فوج کی ٹیم نے مشق میں غیر معمولی کارکردگی کا مظاہرہ کیا اور گولڈ میڈل حاصل کیا۔

آئی ایس پی آر نے کہا ہے کہ یہ واقعی پوری قوم اور پاک فوج کے لیے قابل فخر لمحہ ہے جو اپنی پیشہ ورانہ مہارت اور تربیت کے اعلیٰ ترین معیار کے لیے جانی جاتی ہے۔ پاک فوج نے ہمیشہ ملک کا پرچم سربلند رکھا ہے اور آئندہ بھی کوششیں جاری رکھے گی۔