گورنر بلوچستان سے اطالوی سفیر کی ملاقات، تجارتی تعلقات سمیت باہمی دلچسپی کے امور پر تبادلہ خیال

پیر 13 اکتوبر 2025 17:35

کوئٹہ (اُردو پوائنٹ اخبارتازہ ترین - اے پی پی۔ 13 اکتوبر2025ء) گورنر بلوچستان جعفرخان مندوخیل سے پاکستان میں تعینات اطالوی سفیر ماریلینا ارمیلن نے پیر کو بلوچستان ہائوس اسلام آباد میں ملاقات کی۔ ملاقات کا مقصد پاکستان اور اٹلی کے درمیان خوشگوار دوطرفہ تعلقات کو فروغ دینا، باہمی تعاون اور اقتصادی ترقی کی راہیں تلاش کرنا تھا۔

(جاری ہے)

انہوں نے تجارتی تعلقات، بلوچستان میں سرمایہ کاری اور خطہ کے حالات و واقعات سمیت باہمی دلچسپی کے مختلف امور پر بھی تبادلہ خیال کیا ۔

اس موقع پر گورنر بلوچستان جعفرخان مندوخیل نے کہا کہ اٹلی یورپ کا ایک ترقی یافتہ ملک ہے جومختلف شعبوں میں پاکستان کی مدد کر سکتا ہے ،اطالوی سفیر نے گورنر بلوچستان کو عوام کی سفری سہولت کو آسان بنائے کیلئے کوئٹہ شہر میں ایک " ویزا فیسیلیٹیشن سنٹر" قائم کرنے کی یقین دہانی کرائی اور کہا کہ لورالائی میں زیتون کی کاشت کے لئے تعاون بھی کیا جائیگا ۔ انہوں نے پاکستان اور اٹلی کے درمیان مزید تعلقات اور روابط بڑھانے پر اتفاق کیا ۔.