آفات کے خطرے میں کمی پائیدارترقی کے حصول اورموسمیاتی لچک کی تعمیرکیلئے ناگزیر ہے، اسحاق ڈار

پیر 13 اکتوبر 2025 20:03

اسلام آباد (اُردو پوائنٹ اخبارتازہ ترین - این این آئی۔ 13 اکتوبر2025ء) نائب وزیراعظم و وزیر خارجہ محمد اسحاق ڈار نے آفات کے خطرات، خامیوں اور نقصانات میں کمی کے لیے عالمی کاوشوں کے حوالے سے پاکستان کی ثابت قدم وابستگی کے عزم کا اعادہ کیا ہے۔ آفات کے خطرات کو کم کرنے کے بین الاقوامی دن (13 اکتوبر 2025 )کے موقع پر اپنے پیغام میں انہوں نے کہا کہ آفات کے خطرے میں کمی نہ صرف انسانی وجوہات کی بناء پر بلکہ پائیدار ترقی کے حصول اور موسمیاتی لچک کی تعمیر کے لیے بھی ناگزیر ہے، حالیہ برسوں میں پاکستان نے موسمیاتی آفات کے تباہ کن اثرات کا سامنا کیا ہے جن میں 2022ء کے بدترین سیلاب سے لے کر خشک سالی اور لو کے بار بار آنے والے حملے شامل ہیں۔

حالیہ شدید مون سون بارشوں کا حوالہ دیتے ہوئے نائب وزیراعظم و وزیر خارجہ نے ان موسمیاتی تبدیلیوں کے باعث پاکستان پر پڑنے والے بھاری بوجھ کو ایک اور واضح تنبیہ قرار دیا جس کے نتیجے میں جانیں اور روزگار دونوں کا نقصان ہوا۔

(جاری ہے)

ان تجربات نے فعال، ٹیکنالوجی پر مبنی اور سب کو شامل کرنے ، آفات کے خطرے کے انتظام پر توجہ مرکوز کرنے کے عزم کو مزید مضبوط کیا ہے۔

انہوں نے کہا کہ پاکستان قومی تخفیف خطرات آفات کی حکمت عملی 2025-2030 کی روشنی میں ایک جامع، کثیرالخطرات نقطہ عمل اپنا رہا ہے جو قومی، صوبائی اور ضلعی سطح پر روک تھام، تیاری اور لچک کی تعمیر پر زور دیتا ہے۔ سینڈائی فریم ورک برائے تخفیف خطرات آفات (2015-2030) سے ہم آہنگ، ملکی پالیسیوں میں ابتدائی انتباہی نظاموں کو مضبوط بنانا، پیشگی اقدام کو آگے بڑھانا، ترقیاتی منصوبہ بندی میں خطرے میں کمی کو شامل کرنا اور ابھرتے ہوئے خطرات کو بہتر طور پر پیشن گوئی اور انتظام کرنے کے لیے اختراع اور ٹیکنالوجی سے فائدہ اٹھانا ترجیحی بنیادوں پر شامل ہے۔

اسحاق ڈار نے کہا کہ پاکستان نے بین الاقوامی برادری پر زور دیا ہے کہ وہ تعاون کو مضبوط بنائے، ٹیکنالوجی کی منتقلی کو بہتر بنائے اور مالیاتی میکانزم کو بڑھائے تاکہ ترقی پذیر ممالک موسمیاتی تبدیلی کے تیز ہوتے اثرات کو کم کرنے اور اس کے مطابق ڈھلنے کے قابل ہو سکیں۔تخفیف خطرات آفات کے عالمی دن پر پاکستان ایک محفوظ، زیادہ لچکدار اور پائیدار دنیا کی تعمیر کی اپنی اجتماعی ذمہ داری کی توثیق کرتے ہوئے تمام اقوام کے ساتھ یکجہتی کا اظہار کرتا ہے۔