پنجاب میں اہم شاہراہوں کی بندش سے متعلق پنجاب حکومت کا اہم اعلان

لاہور ( اُردو پوائنٹ اخبارتازہ ترین۔ 13 اکتوبر2025ء ) پنجاب میں اہم شاہراہوں اور تعلیمی اداروں کی بندش سے متعلق پنجاب حکومت کا اہم اعلان۔ تفصیلات کے مطابق مذہبی جماعت کے احتجاج کے باعث لاہور سمیت پنجاب بھر میں پیدا ہونے والی صورتحال سے متعلق اپ ڈیٹ جاری کر دی گئی ہے۔ پنجاب میں جی ٹی روڈ اور موٹروے سمیت کئی اہم اہم شاہراہوں کو عام ٹریفک کیلئے کھول دیا گیا ہے۔

لاہور میں بھی معمولات زندگی بحال ہو گئے، جبکہ پنجاب میں تعلیمی ادارے بھی منگل کے روز معمول کے مطابق کھلیں گے۔ وزیرتعلیم پنجاب کے مطابق احتجاج کے باعث کل بروز منگل کو سکولوں کی بندش سے متعلق خبریں افواہیں ہیں، پنجاب میں کل نجی وسرکاری سکول معمول کے مطابق کھلیں گے۔ یاد رہے پنجاب کے صوبائی دارالحکومت لاہور میں ٹی ایل پی کے ممکنہ احتجاج کے پیش نظر شہر کے تعلیمی اداروں کو آج وقت سے پہلے بند کردیا گیا جبکہ دوپہر کے بعد شہرکی مرکزی شاہراﺅں کو بھی بند کیئے جانے کی اطلاعات سامنے آئیں۔

(جاری ہے)

اطلاعات کے مطابق جی ٹی روڈ پر مریدکے کے قریب ٹی ایل پی کے مرکزی قافلے کو منتشرکیئے جانے کے بعد تنظیم کے کارکناں کو ملتان روڈ پر واقع ٹی ایل پی کے مرکزمیں جمع ہونے کی ہدایات جاری کی گئیں تھیں صوبائی حکومت کی جانب سے شہر میں دفعہ 144نافذ ہے اور پارٹی کے مرکزکے گرد ونواح میں کئی کلومیٹرتک کا علاقہ جمعہ کے روز سے سیل ہے۔ دوسری جانب مریدکے میں پولیس نے تحریک لبیک پاکستان (ٹی ایل پی) کے لانگ مارچ کے خلاف آپریشن مکمل کر لیا جبکہ مظاہرین کی فائرنگ سے ایس ایچ او فیکٹری ایریا شہزاد جھومڑ شہید ہوگئے سیکیورٹی اداروں نے ٹی ایل پی کے خلاف آپریشن کرتے ہوئے تمام کارکنان کو منتشر کرکے جی ٹی روڈ کو خالی کروا لیا تاہم ممکنہ احتجاج کے پیش نظرصوبائی دارالحکومت لاہور کی مرکزی شاہراﺅں کو آج دوپہر کے بعد بند کردیا گیا. سیکیورٹی اداروں نے پورے جی ٹی روڈ کا مکمل کنٹرول حاصل کرلیا ہے۔

اسی طرح احتجاج کی وجہ سے جڑواں شہروں راولپنڈی اور اسلام آباد کے مابین چلنے والی میڑو بس سروس مسلسل چوتھے روز بھی بند رہی میڑو بس سروس کو 9 اکتوبر کی شام 5 بجے بند کیا گیا تھا. دفاتر و تعلیمی ادارے کھلنے و کاروباری سرگرمیاں بحال ہونے کے بعد میڑو بس سروس بند ہونے سے شہریوں کو سفری مشکلات کا سامنا ہے انتظامیہ میڑو بس اتھارٹی کے مطابق ابھی تک انتظامیہ کی جانب سے میڑو بس سروس کھولنے کے حوالے سے کوئی ہدایت نہیں ملی، جیسے ہی انتظامیہ کی جانب سے کلیئرینس ملے گی میڑو بس سروس کو بحال کر دیا جائے گا۔