مقبوضہ جموں وکشمیر بین الاقوامی طور پر تسلیم شدہ ایک متنازعہ علاقہ ہے ، شگفتہ نورین کاظمی

بدھ 15 اکتوبر 2025 15:44

مظفرآباد(اُردو پوائنٹ اخبارتازہ ترین - این این آئی۔ 15 اکتوبر2025ء) نائب صدر وممبر کوآرڈینیشن کمیٹی پاکستان پیپلزپارٹی خواتین ونگ آزاد جموں وکشمیر شگفتہ نورین کاظمی نے بھارت اور افغان وزرائے خارجہ کی مشترکہ پریس کانفرنس کے دوران مقبوضہ جموں و کشمیر کے بارے میں دیے گئے بیان کی شدید ترین مذمت کرتے ہوئے کہا ہے کہ مقبوضہ جموں وکشمیر بین الاقوامی طور پر تسلیم شدہ ایک متنازعہ علاقہ ہے نئی دہلی کی مشترکہ پریس کانفرنس میں دیا گیا بیان اقوام متحدہ کی سلامتی کونسل کی قراردادوں کی کھلی خلاف ورزی ہے۔

ان خیالات کا اظہار انھوں نے گذشتہ روز میڈیا سے گفتگو کرتے ہوئے کیا انہوں نے افسوس کا اظہار کیا کہ افغان قیادت نے مقبوضہ جموں وکشمیر کے مظلوم عوام کی جدوجہدِ آزادی سے منہ موڑ کر تاریخ اور امت دونوں کے ساتھ ناانصافی کی ان کا کہنا تھا کہ مقبوضہ جموں و کشمیر پر بھارت کا کوئی بھی غیر قانونی دعویٰ عالمی قوانین اور اقوام متحدہ کی قراردادوں کے منافی ہے بھارت دنیا کا سب سے بڑا دہشتگرد ملک ہے۔

(جاری ہے)

انھوں نے اقوام متحدہ، او آئی سی اور عالمی برادری پر زور دیا کہ وہ بھارت کے غیر قانونی قبضے، انسانی حقوق کی خلاف ورزیوں اور آبادی کے تناسب میں تبدیلی کا فوری نوٹس لیں اور کشمیری عوام کے اقوام متحدہ کے تسلیم شدہ حق خودارادیت کو یقینی بنانے میں اپنا موثر کردار ادا کریں۔ان کا کہنا تھا کہ نئی دہلی کی مشترکہ پریس کانفرنس میں کہے گئے الفاظ اقوام متحدہ کی سلامتی کونسل کی قراردادوں کی کھلی خلاف ورزی ہیں ان شاء اللہ بہت جلد تحریک آزادی کشمیر اپنے منطقی انجام کو پہنچے گی شہداء مقبوضہ جموں وکشمیر کا خون رنگ لائے گا مقبوضہ جموں وکشمیر جلد آزاد ہو کر پاکستان کا حصہ بنے گا۔