صدر سے آڈیٹر جنرل آف پاکستان مقبول احمد گوندل کی ملاقات

امید ہے آڈیٹر جنرل کا دفتر قومی مفاد میں اعلیٰ معیار کے احتساب کو برقرار رکھے گا، آصف زر داری

بدھ 15 اکتوبر 2025 20:40

اسلام آباد (اُردو پوائنٹ اخبارتازہ ترین - این این آئی۔ 15 اکتوبر2025ء) صدر مملکت آصف علی زرداری سے آڈیٹر جنرل آف پاکستان مقبول احمد گوندل نے ایوانِ صدر میں ملاقات کی۔بدھ کو ایوان صدر کے پریس ونگ سے جاری بیان کے مطابق صدر مملکت نے مالی شفافیت، احتساب اور گڈ گورننس کے فروغ میں آڈیٹر جنرل کے کردار کو سراہتے ہوئے کہا کہ آڈیٹر جنرل کا آئینی کردار ملکی مالی نظم و ضبط کو مستحکم کرنے میں بنیادی حیثیت رکھتا ہے، آڈیٹر جنرل کے ادارے کا مالی وسائل کے مؤثر استعمال اور نظام کی بہتری میں اہم کردار ہے۔

(جاری ہے)

صدر مملکت نے ہدایت کی کہ محکمہ اندرونی اصلاحات اور کارکردگی میں بہتری کے لئے متعلقہ اداروں کے ساتھ قریبی تعاون جاری رکھے۔صدر مملکت نے زور دیا کہ آڈٹ رپورٹس پر مؤثر عملدرآمد اور بروقت اصلاحی اقدامات سے کرپشن اور مالی بے ضابطگیاں کم کی جا سکتی ہیں۔انہوں نے کہا کہ عالمی بہترین طریقہ کار اور جدید ٹیکنالوجی، بشمول مصنوعی ذہانت، اپنانے سے شفافیت میں اضافہ ممکن ہے۔صدر آصف علی زرداری نے کہا کہ مالی شفافیت، مؤثر طرزِ حکمرانی اور پیشہ وارانہ دیانت کی ضرورت آج پہلے سے کہیں زیادہ ہے۔صدر مملکت نے یقین ظاہر کیا کہ آڈیٹر جنرل کا دفتر قومی مفاد میں اعلیٰ معیار کے احتساب کو برقرار رکھے گا۔