منی لانڈرنگ کے 2 مقدمات میں ملک ریاض اور ان کا بیٹا اشتہاری قرار

عدالت نے پراپرٹی ٹائیکون و دیگر اشتہاری ملزمان کے شناختی کارڈ اور سمز بلاک کرنے کا حکم دے دیا

Sajid Ali ساجد علی جمعرات 16 اکتوبر 2025 15:58

منی لانڈرنگ کے 2 مقدمات میں ملک ریاض اور ان کا بیٹا اشتہاری قرار
اسلام آباد (اُردو پوائنٹ اخبارتازہ ترین۔ 16 اکتوبر2025ء) عدالت نے منی لانڈرنگ کے 2 مقدمات میں پراپرٹی ٹائیکون ملک ریاض اور ان کے بیٹے کو اشتہاری قرار دے دیا۔ اطلاعات کے مطابق ڈسٹرکٹ اینڈ سیشن کورٹس اسلام آباد نے منی لانڈرنگ کے 2 مقدمات میں ملک ریاض اور ان کے بیٹے علی ریاض ملک کو اشتہاری قرار دے دیا ہے جہاں بحریہ ٹاؤن کی رقوم کو مبینہ طور پر منی لانڈرنگ کے ذریعے بیرون ملک بھیجنے کے کیسز کی سماعت ہوئی، اس حوالے سے اپنے فیصلے میں عدالت نے پراپرٹی ٹائیکون ملک ریاض اور دیگر اشتہاری ملزمان کے شناختی کارڈ اور سمز بھی بلاک کرنے کا حکم دے دیا۔

قبل ازیں وفاقی وزیر اطلاعات عطا اللہ تارڑ نے دعویٰ کیا تھا کہ وفاقی تحقیقاتی ادارے ایف آئی اے نے ایک جاری تفتیش کے دوران بحریہ ٹاؤن اور ملک ریاض کے خلاف مبینہ کرپشن کے ثبوت حاصل کرلیے، ایک ارب 12 کروڑ روپے کی منی لانڈرنگ کے شواہد سامنے آئے ہیں، بحریہ ٹاؤن نے ریکارڈ اور کیش کو چھپانے کے لیے بحریہ ٹاؤن کے سفاری ہسپتال کو فرنٹ آفس بنایا اور ہسپتال کی ایمبولینس کو ریکارڈ اور کیش کی نقل و حرکت کیلئے استعمال کیا گیا۔

(جاری ہے)

انہوں نے الزام عائد کیا کہ بحریہ ٹاؤن کے ملازمین نے ریکارڈ جلانے کی کوشش کی، جس پر کچھ ریکارڈ ضائع بھی ہوا لیکن زیادہ تر شواہد ایف آئی اے نے اپنی تحویل میں لیے، یہ شواہد ہنڈی، حوالہ اور منی لانڈرنگ کے نیٹ ورک سے متعلق ہیں، یہ منظم نیٹ ورک تھا جس کے ذریعے پاکستان سے باہر رقوم غیر قانونی طریقے سے بھیجی جا رہی تھیں، رقوم بھیجنے کے لیے غیر قانونی ذرائع کا استعمال کیا گیا، تاہم بحریہ ٹاؤن کے رہائشیوں کے حقوق محفوظ ہیں اور یہ کارروائی صرف اُن افراد کے خلاف کی جا رہی ہے جو براہ راست منی لانڈرنگ اور غیر قانونی سرگرمیوں میں ملوث پائے گئے۔