ْپاکستان پیپلز پارٹی عوامی بہبود اور مساوات پر مبنی ایجنڈے پر مستقل کاربند ہے، شیری رحمان

جمعہ 17 اکتوبر 2025 21:22

اسلام آباد (اُردو پوائنٹ اخبارتازہ ترین - این این آئی۔ 17 اکتوبر2025ء) نائب صدر پیپلز پارٹی سینیٹر شیری رحمان نے کہاہے کہ پاکستان پیپلز پارٹی عوامی بہبود اور مساوات پر مبنی ایجنڈے پر مستقل کاربند ہے۔غربت کے خاتمے کے عالمی دن پر اپنے بیان میں شیری رحمن نے کہاکہ پاکستان میں غربت کی لکیر کے نیچے زندگی گزارنے والوں کی شرح 45 فیصد تک جا پہنچی ہے، گزشتہ برس یہ شرح 39 فیصد تھی جو اس سال نمایاں طور پر بڑھی ہے، ماحولیاتی بگاڑ اور آمدنی کی غیر مساوی تقسیم نے غربت کو بڑھاوا دیا ہے۔

شیری رحمان نے کہاکہ مہنگائی میں اضافے نے عام آدمی کی مالی مشکلات میں شدت پیدا کر دی ہے، پاکستان پیپلز پارٹی عوامی بہبود اور مساوات پر مبنی ایجنڈے پر مستقل کاربند ہے۔ انہوںنے کہاکہ بینظیر انکم سپورٹ پروگرام خواتین کی معاشی خودمختاری کی نمایاں مثال ہے، بینظیر انکم سپورٹ پروگرام نے لاکھوں کمزور خاندانوں کو معاشی سہارا فراہم کیا ہے۔

(جاری ہے)

انہوںنے کہاکہ غربت کا مکمل خاتمہ پیپلز پارٹی کے ترجیحی اہداف میں سرفہرست ہے، پائیدار ترقی کے لیے مربوط حکمتِ عملی ناگزیر ہے۔ شیری رحمن نے کہاکہ حکومت سماجی تحفظ کے نظام کو مزید مضبوط کرے، تعلیم، صحت، اور روزگار کے مواقع کو ہر شہری کے لیے یقینی بنائے، پاکستان پیپلز پارٹی ایک پرامن، خوشحال اور برابری پر مبنی معاشرے کے قیام کے لیے اپنی جدوجہد جاری رکھے گی۔