مہاجرین ریاست جموں وکشمیرکا جزو لاینفک ہیں ،ان کے ووٹ کے حق کا بھرپور تحفظ کیا جائے گا، مسلم لیگ ن آزادکشمیرکا پارلیمانی پارٹی اجلاس میں فیصلہ

اسلام آباد (اُردو پوائنٹ اخبارتازہ ترین - اے پی پی۔ 18 اکتوبر2025ء) پاکستان مسلم لیگ ن کی پارلیمانی پارٹی نےواضح کیا ہے کہ مسلم لیگ ن کسی ایسے فیصلے کا حصہ نہیں بنے گی جس سے مسئلہ کشمیر، کشمیری عوام یا مسلم لیگ ن کے کارکنوں کے مفاد کو زک پہنچے،مہاجرین جموں کشمیر ریاست جموں وکشمیر کا جزو لاینفک ہیں اور ان کے ووٹ کے حق کا بھرپور تحفظ کیا جائے گا۔

یہاں جاری بیان کے مطابق اس بات کا فیصلہ صدر مسلم لیگ ن آزادکشمیر شاہ غلام قادر جموں کشمیر کی زیرصدارت کشمیر ہائوس اسلام آباد میں منعقدہ پارلیمانی پارٹی اجلاس میں کیا گیا۔ اجلاس میں سابق وزیراعظم و پارلیمانی لیڈر راجہ محمد فاروق حیدر خان،موسٹ سینئر وزیر کرنل ریٹائرڈ وقار نور ،سردار عامر الطاف، احمد رضا قادری ،راجہ محمد صدیق ،چوہدری اسماعیل، اکمل سرگالہ، نثارہ عباسی نے شرکت کی۔

(جاری ہے)

پارلیمانی پارٹی کے اجلاس میں افغانستان کی پاکستان میں دراندازی کی شدید مذمت کرتے ہوئے پاک فوج کی جانب سے فتنہ الخوارج اور فتنہ الہندوستان کو منہ توڑ جواب دینے پر خراج تحسین پیش کیا گیا ۔اجلاس میں ہندوستانی وزراء اور بھارتی مکار لیڈروں کی جانب سے آزادکشمیر پر قبضہ کے بیانات کی شدید مذمت کرتے ہوے اس عزم کا اعادہ کیا گیا کہ آزادکشمیر کے عوام پاکستان کے ساتھ ملکر خطے کے چپے چپے کا انشاءاللہ بھرپور دفاع کریں گے۔

اجلاس میں آزادکشمیر کی موجودہ سیاسی صورتحال پر طویل مشاورت کے بعد فیصلہ کیا گیا کہ تمام صورتحال سے مرکزی قیادت کو آگاہ کیا جائے گا ،موجودہ صورتحال میں مسلم لیگ ن کسی ایسے فیصلے کا حصہ نہیں بنے گی جس سے مسئلہ کشمیر، کشمیری عوام یا مسلم لیگ کے کارکنوں کے مفاد کو زک پہنچے ،مسلم لیگ ن آزادکشمیر کے عوام کو یقین دلاتی ہے کہ اس کی پارلیمانی پارٹی و جماعتی تنظیم ان کی امنگوں کی ترجمان ہے اور ان کو کسی طالع آزما کے رحم و کرم پر نہیں چھوڑا جائےگا ۔

مسلم لیگ ن ہر صورت نظریہ الحاق پاکستان پر سختی سے کاربند رہےگی اور کسی بھی ایسے نظریہ کا بھرپور مقابلہ کرے گی جو آباؤ اجداد کی قربانیوں، جدوجہد اور قومی مفادات کے منافی ہو۔اجلاس میں فیصلہ کیا گیا کہ مسلم لیگ ن کسی ایسے سیاسی عمل کا حصہ نہیں بنے گی جس میں اس کی مشاورت شامل نا ہو۔اجلاس میں اس عزم کا اعادہ کیا گیا کہ مہاجرین جموں کشمیر ریاست جموں وکشمیر کا جزو لاینفک ہیں اور ان کے ووٹ کے حق کا بھرپور تحفظ کیا جائے گا۔