مسلم کانفرنس ریاست جموں و کشمیر کی سب سے قدیم اور نظریاتی جماعت ہے،سردار عتیق احمد خان

مظفرآباد/دھیرکوٹ (اُردو پوائنٹ اخبارتازہ ترین - این این آئی۔ 19 اکتوبر2025ء) آل جموں و کشمیر مسلم کانفرنس کے صدر و سابق وزیراعظم آزاد جموں و کشمیرسردار عتیق احمد خان نے دھیرکوٹ، سنگڑھ اور بٹھارہ کا دورہ کیا۔ اس دوران انہوں نے مختلف مقامات پر مسلم کانفرنس کے کارکنان اور رہنماؤں سے ملاقاتیں کیں، مرحوم رہنماؤں کے لواحقین سے اظہارِ تعزیت کیا، اور جماعتی امور پر تفصیلی مشاورت کی۔

سردار عتیق احمد خان نے سنگڑھ بٹھارہ میں ممبر ڈسٹرکٹ کونسلر و صدر یونین کونسل چمیاٹی سردار شوکت افضل عباسی کی رہائش گاہ پر مسلم کانفرنس کے مقامی کارکنان سے ملاقات کی۔کارکنان نے اپنے قائد کا پُرجوش استقبال کیا، پھولوں کے ہار پہنائے اور نعروں سے فضا گونج اُٹھی۔اس موقع پر کارکنان سے خطاب کرتے ہوئے صدر مسلم کانفرنس سردار عتیق احمد خان نے کہامسلم کانفرنس ریاست جموں و کشمیر کی سب سے قدیم اور نظریاتی جماعت ہے۔

(جاری ہے)

اسی جماعت نے 1932 میں کشمیری قوم کو ایک پلیٹ فارم پر اکٹھا کیا، اور آج بھی ہم اسی نظریے کے امین ہیں۔ تحریکِ آزادی کشمیر کی بنیاد اسی جماعت نے رکھی، اور ہم آج بھی اس جدوجہد کے محافظ ہیں۔انہوں نے مزید کہا کہ مسلم کانفرنس نے ہمیشہ الحاقِ پاکستان کے نظریے، کشمیری تشخص اور اسلامی اقدار کے تحفظ کے لیے قربانیاں دی ہیں۔ہمارے بزرگوں نے جس مشن کے لیے اپنی زندگیاں وقف کیں، ہم اُس پر قائم ہیں۔

کوئی طاقت ہمیں اپنے اصولوں اور مقاصد سے نہیں ہٹا سکتی۔ مسلم کانفرنس کا ہر کارکن دراصل تحریکِ آزادی کا سپاہی ہے، جو ریاست کے مستقبل کو پاکستان کے ساتھ محفوظ دیکھتا ہے۔سردار عتیق احمد خان نے کہا کہ آج کے دور میں نظریاتی سیاست کو دوبارہ زندہ کرنا وقت کی ضرورت ہے۔یہ جماعت مفادات کی سیاست نہیں بلکہ نظریے اور ایمان کی سیاست کرتی ہے۔

کارکن ہمارا سرمایہ ہیں، اُن کے بغیر جماعت ایک جسم کے بغیر روح کے مانند ہے۔ ہم کارکنوں کو مضبوط کریں گے، تنظیمی ڈھانچے کو نچلی سطح تک فعال بنائیں گے اور عوامی رابطہ مہم کو تیز کریں گے۔انہوں نے نوجوانوں پر زور دیا کہ وہ مسلم کانفرنس کے تاریخی کردار سے روشناس ہوں اور سوشل میڈیا سمیت ہر پلیٹ فارم پر جماعت کا نظریہ اجاگر کریں۔اپنے دورے کے دوران صدر مسلم کانفرنس سردار عتیق احمد خان نے رنگلہ سیری کا دورہ کیا، جہاں انہوں نے مسلم کانفرنس یونین کونسل رنگلہ کے مرکزی رہنما راجہ محمد نذیر خان کی والدہ محترمہ کی وفات پر گہرے دکھ اور افسوس کا اظہار کیا۔

انہوں نے مرحومہ کی مغفرت، بلند درجات اور پسماندگان کے لیے صبرِ جمیل کی دعا کی۔انہوں نے کہا کہ دکھ کی اس گھڑی میں جماعت اپنے کارکنان اور اُن کے خاندانوں کے ساتھ کھڑی ہے۔صدر مسلم کانفرنس نے سنگڑھ بٹھارہ میں مسلم کانفرنس کے متحرک رہنما کونسلر ٹھیکیدار محفوظ عباسی سے ان کی والدہ محترمہ کے انتقال پر تعزیت کی۔انہوں نے کہا کہ والدین کا سایہ ایک نعمت ہے، اور اُن کی وفات ایسا خلا چھوڑ جاتی ہے جو کبھی پُر نہیں ہو سکتا۔

انہوں نے دعا کی کہ اللہ تعالیٰ مرحومہ کو جنت الفردوس میں اعلیٰ مقام عطا فرمائے۔اپنے تین روزہ دورے کے دوران سردار عتیق احمد خان بڈھیار بھی گئے، جہاں انہوں نے عبدالروف خان عباسی مرحوم کے بیٹے فیصل عباسی اور دیگر اہلِ خانہ سے ملاقات کی اور دلی ہمدردی کا اظہار کیا۔انہوں نے کہا کہ مسلم کانفرنس صرف ایک سیاسی جماعت نہیں بلکہ ایک خاندان ہے، اور جماعت اپنے کارکنوں کے دکھ درد میں برابر کی شریک ہے۔تین روزہ دورہ مکمل کرنے کے بعد صدر مسلم کانفرنس و سابق وزیراعظم آزادکشمیرسردار عتیق احمد خان مظفرآباد پہنچ آئے ۔