چوہدری انوارالحق کیخلاف تحریک عدم اعتماد جمع کروا دی گئی، فیصل راٹھور وزیراعظم آزاد کشمیر کیلئے نامزد

ہمیشہ کہتا تھا پیپلزپارٹی آپسی مشاورت کے ساتھ تمام فیصلے کرتی ہے، آزاد کشمیر میں پاکستان پیپلزپارٹی حکومت بنائے گی، راجہ پرویز اشرف

فیضان ہاشمی جمعہ 14 نومبر 2025 14:47

چوہدری انوارالحق کیخلاف تحریک عدم اعتماد جمع کروا دی گئی، فیصل راٹھور ..

اسلام آباد(اُردو پوائنٹ اخبارتازہ ترین۔ 14 نومبر2025ء) پاکستان پیپلزپارٹی نے فیصل راٹھور کو وزیراعظم آزاد کشمیر کے لئے نامزد کر دیا۔ جبکہ دوسری جانب وزیراعظم آزاد جموں و کشمیر چوہدری انوارالحق کے خلاف تحریک عدم اعتماد جمع کروا دی گئی ہے۔ اسلام آباد میں راجہ پرویز اشرف کا صحافیوں سے بات چیت کرتے ہوئے کہنا تھا کہ کہ ہمیشہ کہتا تھا پیپلزپارٹی آپسی مشاورت کے ساتھ تمام فیصلے کرتی ہے، آزاد کشمیر میں پاکستان پیپلزپارٹی حکومت بنائے گی۔

انہوں نے کہا کہ آزاد کشمیر پیپلزپارٹی کے دل کے قریب ہے، پوری کوشش کریں گے کشمیریوں کیلئے آسانیاں لیکر آئیں، ہم حکومت بنانے کی پوزیشن میں ہیں، ہمارے پاس تعداد پوری ہے تو کسی کی حمایت کی ضرورت نہیں۔ اس موقع پر پیپلزپارٹی آزاد کشمیر کے صدر چودھری یاسین کا کہنا تھا کہ شہید بینظیر بھٹو نے کشمیر کے معاملے کو ہمیشہ ترجیح دی، صدر مملکت آصف علی زرداری نے بھی ہر فورم پر کشمیریوں کے حق خودارادیت کی کھل کر بات کی، پیپلزپارٹی اور کشمیر کا چولی دامن کا ساتھ ہے۔

(جاری ہے)

انہوں نے کہا کہ آزاد کشمیر میں پیپلزپارٹی کی پوزیشن بہت مضبوط ہے، پیپلزپارٹی نے آزاد کشمیر کے موجودہ سیاسی صورتحال کو دیکھتے ہوئے یہ فیصلہ کیا، آزادکشمیر میں حکومت پھولوں کی سیج نہیں بلکہ کانٹوں کی مالا ہے۔ ان کا کہنا تھا کہ فیصل راٹھور کو وزیراعظم بنانے کا فیصلہ کیا، حکومت بنانے کیلئے ہمارے پاس نمبرزموجود ہیں، ہمارے پاس 27 گولڈن نمبر ہے اگر مسلم لیگ ن کے ارکان شامل ہو جائیں تو تعداد 40 ہو جائے گی۔ تحریک عدم اعتماد پر 17 اراکین سے زائد کے دستخط موجود ہیں، پاکستان پیپلز پارٹی کے ارکان اسمبلی کی طرف سے تحریک عدم اعتماد جمع کروائی گئی ہے، تحریک عدم اعتماد جمع کروانے والوں میں جاوید ایوب، قاسم مجید، رفیق نیئر، ملک ظفر اور علی شان سونی شامل ہیں۔