فیصل ممتاز راٹھور سے آزاد کشمیر بار کونسل کے وائس چیئرمین محمد طارق بشیر ایڈووکیٹ کی قیادت میں وفد کی ملاقات

جمعہ 19 دسمبر 2025 18:24

اسلام آباد (اُردو پوائنٹ اخبارتازہ ترین - این این آئی۔ 19 دسمبر2025ء) آزاد جموں و کشمیر کے وزیراعظم فیصل ممتاز راٹھور سے آزاد جموں و کشمیر بار کونسل کے وائس چیئرمین محمد طارق بشیر ایڈووکیٹ کی قیادت میں وفد نے جموں کشمیر ہاؤس اسلام آباد میں تفصیلی ملاقات کی۔ وفد میں محمد ندیم خان ایڈووکیٹ، چوہدری وسیم صابر ایڈووکیٹ، تعظیم عزیز ایڈووکیٹ، شجاعت علی راٹھور ایڈووکیٹ، سید عاصم مسعود گیلانی ایڈووکیٹ، سید اشفاق حسین کاظمی ایڈووکیٹ، ہارون ریاض مغل ایڈووکیٹ، میر تنویر ایڈووکیٹ، صغیر حیدر جرال ایڈووکیٹ، اشتیاق احمد راجہ ایڈووکیٹ سمیت بار کونسل کے دیگر ممبران شریک تھے۔

اس موقع پر وزیر چوہدری قاسم مجید اور ڈی جی پولیٹیکل افیئرز عامر ذیشان جرال بھی موجود تھے۔

(جاری ہے)

ملاقات کے دوران آزاد جموں و کشمیر بار کونسل کے وفد نے وزیراعظم کو وکلا برادری کو درپیش مختلف مسائل اور بار کونسل سے متعلق اہم امور سے آگاہ کیا۔ وفد نے بار کونسل کی مستقل مکانیت کے قیام، وکلا کے تحفظ کو یقینی بنانے کے لیے لائرز پروٹیکشن ایکٹ کے مؤثر نفاذ، بار کونسل کی گرانٹ اِن ایڈ میں اضافے، ضلع حویلی میں جوڈیشل کمپلیکس کے قیام، تحصیل دھیرکوٹ میں جوڈیشل کمپلیکس اور تحصیل برنالہ میں ایڈیشنل ڈسٹرکٹ کورٹ کے قیام کی ضرورت پر زور دیا۔

اس کے علاوہ وفد نے مختلف ٹربیونلز میں وکلا کی تعیناتی نہ کیے جانے، سرکاری سطح پر تعینات لاء افسران کے طریقہ کار اور وکلا کی نمائندگی سے متعلق امور پر بھی تفصیلی گفتگو کی۔ بار کونسل کے نمائندگان نے اس امر پر زور دیا کہ وکلا کو درپیش انتظامی و پیشہ ورانہ مسائل کے حل سے انصاف کی فراہمی کے نظام کو مزید مؤثر اور مضبوط بنایا جا سکتا ہے۔

وزیراعظم فیصل ممتاز راٹھور نے بار کونسل کے وفد کی تمام تجاویز اور مطالبات کو بغور سنا اور یقین دہانی کرائی کہ حکومت وکلا برادری کے جائز مسائل کے حل کے لیے سنجیدہ اقدامات کرے گی۔ وزیراعظم نے کہا کہ وکلا برادری عدالتی نظام میں ریڑھ کی ہڈی کی حیثیت رکھتی ہے اور ان کے مسائل کا حل انصاف کی بروقت اور شفاف فراہمی کے لیے ناگزیر ہے۔انہوں نے مزید کہا کہ بار کونسل کی مکانیت، جوڈیشل کمپلیکسز کے قیام اور وکلا کے تحفظ سے متعلق معاملات کو متعلقہ محکموں کے ساتھ مشاورت سے ترجیحی بنیادوں پر آگے بڑھایا جائے گا۔

وزیراعظم نے اس عزم کا اظہار کیا کہ آزاد جموں و کشمیر میں قانون کی بالادستی، انصاف کی فراہمی اور عدالتی نظام کی بہتری کے لیے حکومت بار کونسل کے ساتھ مکمل تعاون جاری رکھے گی۔