پی ٹی آئی نے پہلے مذاکرات سے انکار کیا،اب خود بات کر رہی ہے، سینیٹرناصربٹ

ہفتہ 27 دسمبر 2025 20:10

راولپنڈی (اُردو پوائنٹ اخبارتازہ ترین - این این آئی۔ 27 دسمبر2025ء) مسلم لیگ (ن)کے سینیٹر ناصر بٹ نے کہاہے کہ وزیراعظم نے ہی پی ٹی آئی کو مذاکرات کی دعوت دی ہے جس پرمحمود خان اچکزئی نے ذمہ داری اٹھائی ہے لیکن بانی پی ٹی آئی وزیر اعلی کے پی کو کہہ رہے ہیں تیاری کرو ہم گلیوں میں مارچ کرینگے ، اس رویئے اور سوچ سے کیا حل نکل سکتا ہے ۔

(جاری ہے)

راولپنڈی پریس کلب میں میڈیا سے گفتگو میں سینیٹر ناصر بٹ نے کہا کہ شہباز شریف کی پی ٹی آئی کومذاکرات کی پیش کش خوش آئند ہے ، مسلم لیگ (ن) دو سال سے مذاکرات کی بات کر رہی تھی، پی ٹی آئی نے پہلے انکار کیا، اب خود بات کر رہی ہے ، ان کا ٹریک رریکارڈ دیکھیں تو ان کے ساتھ اگر کوئی معاہدہ ہوا تو کیا اس پاسداری بھی کی جائے گی ۔

ایک سوال پر سینیٹر ناصر بٹ نے کہا پی آئی اے کا سالانہ خسارہ حکومت کیلئے ناقابل برداشت ہو چکا تھا ، دنیا بھر میں ایئرلائنز کی نجکاری ہو چکی، پاکستان میں بھی یہ ضروری تھی ، حکومت کے پاس پی آئی اے کے 25فیصد شیئرز اب بھی موجودرہیں گے، سٹیل مل کی نجکاری بھی ہونی چاہئے۔ ناصر بٹ نے سوال اٹھایا کہ جعلی لائسنس اسکینڈل نے پی آئی اے کو عالمی سطح پرنقصان پہنچایا، جعلی پائلٹ لائسنس کا اعلان کرنے والے سابق وزیر کو سزا کیوں نہیں دی گئی ۔