ہزارہ برادری کی جانب سے ملک بھر کی طرح کراچی میں بھی اپنا ثقافتی دن جوش و خروش سے منایا گیا

ہزارہ کلچر ڈے پر شہر کے بلدیہ ٹائون،قائد آباد،خواجہ اجمیر نگری سمیت مختلف علاقوں میں ریلیاں نکالی گئیں جو کلاک ٹاور سی ویو کلفٹن پراختتام پذیر ہوئیں

پیر 5 جنوری 2026 04:00

کراچی(اُردو پوائنٹ اخبارتازہ ترین - این این آئی۔ 05 جنوری2026ء) ہزارہ برادری کی جانب سے اتوار کو ملک بھر کی طرح کراچی میں بھی اپنا ثقافتی دن جوش و خروش سے منایا گیا۔ہزارہ کلچر ڈے پر شہر کے بلدیہ ٹائون،قائد آباد،خواجہ اجمیر نگری سمیت مختلف علاقوں میں ریلیاں نکالی گئیں جو کلاک ٹاور سی ویو کلفٹن پراختتام پذیر ہوئیں۔ سی ویو کلفٹن پر صوبہ ہزارہ تحریک ،لیبر اسکوائر بلدیہ ٹائون پر تحریک انقلاب صوبہ ہزارہ،کراچی پریس کلب پر تحریک اتحاد ہزارہ پاکستان اور ریلوے گرائونڈ کالا پل پر ہزارہ قبائل مشاورتی کونسل کے تحت ہزارہ کلچر ڈے پر مرکزی پروگرام منعقد کیئے گئے۔

کراچی پریس کلب پر ہزارہ کلچر ڈے کی مناسبت سے کیک کاٹا گیا،جس میں پیپلز پارٹی کے رکن سندھ اسمبلی فاروق اعوان اور مختیار تنولی نے شرکت کی ۔

(جاری ہے)

بلدیہ ٹائون میں ہزارہ ثقافتی پروگرام سے تحریک انقلاب صوبہ ہزارہ کے چیئرمین سید مصدق حسین بخاری ،صدر عبدالباسط خان تنولی اور ڈپٹی سیکریٹری جنرل وسیم احمد ترک نے خطاب کیا۔سی ویو کلفٹن پر ثقافتی پروگرام سے چیف آرگنائزر صوبہ ہزارہ خورشید ہزاروی اور آصف مغل اور ریلوے گرائونڈ کالا پل پر ثقافتی تقریب سے ہزارہ قبائل مشاورتی کونسل سے کے رہنمائوں نواب زادہ صلاح الدین سعید،حاجی ابرار حسین،حاجی ذوالفقار علی خان تنولی،خان محمد تنولی،راشد محمود اعوان،آصف تنولی اور دیگر نے خطاب کیا۔

ہزارہ کلچر ڈے کے پروگراموں میں روایتی گہماگہمی دیکھنے میں آئی۔ہزارہ کمیونٹی کے افراد نے روایتی لباس زیب تن کررکھے تھے۔ان ثقافتی پروگراموں میں ہزارہ برادری کی ثقافتی نمائش، روایتی رقص، موسیقی، تقریریں اور دیگر سرگرمیاں شامل تھیں۔ہزارہ ثقافتی دن پر ان پروگراموں میں روایتی کھیل پیش کیا گیا۔مشہور ہزارہ کے گلوکاروں یاسر کشمیری،بشیر گجر ہزارہ، یوسف ہزارہ،اعظم ہزارہ سمیت دیگر نے ثقافتی گیت گائے۔

جس پر شرکا نے ان گلوکاروں کو خوب داد دی۔ان پروگراموں میں موجود شرکا نے مختلف انداز میں ہزارہ ثقافت کو اجاگر کیا۔ثقافتی پروگراموں سے خطاب میں ہزارہ برادری کے رہنمائوں نے کہا کہ ہزارہ برادری ایک پرامن قوم ہے۔ہم وطن عزیزکی سلامتی اور ترقی میں اپنا کرادر ادا کرتے رہیں گے۔ہزارہ کا پیغام امن محبت اور بھائی چارگی ہے۔انہوں نے کہا کہ ہم سب نے مل کر اپنی ثقافت کا جشن منایا ہے۔ہم ہرسال ہزارہ کلچر ڈے منائیں گے۔ہمارامطالبہ ہے کہ حکومت فوری صوبہ ہزارہ کے قیام کا اعلان کرے ۔ہم صوبہ ہزارہ کے قیام کے لیے اپنی پر امن جدوجہد جاری رکھیں گے۔