جیل میں مشکل وقت گزرا، سوچ رہا تھا خودکشی کرلوں، ناصر جمشید

اپنے کئے پر شرمندہ ہوں ،ناصر جمشید بیتے دنوں کو یاد کر کے آبدیدہ ہوگئے والد کے ایکسیڈنٹ میں برین ہیمرج اور گھریلو حالات کے سبب پیسہ کمانے کیلئے شارٹ کٹ اختیار کیا تھا، گفتگو

بدھ 11 فروری 2026 20:50

لندن (اُردو پوائنٹ اخبارتازہ ترین - این این آئی۔ 11 فروری2026ء) میچ فکسنگ اسکینڈل میں ملوث پاکستانی کرکٹر ناصر جمشید نے معافی مانگ لی اور کہا ہے کہ میرا جیل میں مشکل وقت گزرا، سوچ رہا تھا خودکشی کرلوں۔ایک انٹرویو کے دور ان ناصر جمشید بیتے دنوں کو یاد کر کے آبدیدہ ہوگئے، انہوں نے پاکستانی قوم اور دنیا بھر میں کرکٹ فینز سے معافی مانگ لی۔ناصر جمشید نے کہا کہ وہ اپنے کیے پر شرمندہ ہیں، نئے کھلاڑیوں کو کہیں گے کہ کبھی بدعنوانی میں ملوث نہ ہوں، سزا کے بعد انہوں نے جیل میں مشکل وقت گزارا۔

ناصر جمشید نے چیئرمین پی سی بی سے درخواست کی کہ اٴْن کی پابندی کا ایک سال رہ گیا ہے اسے معاف کر دیں۔انہوں نے کہا کہ والد کے ایکسیڈنٹ میں برین ہیمرج اور گھریلو حالات کے سبب پیسہ کمانے کیلئے شارٹ کٹ اختیار کیا تھا، مجھے وکیل نے ہی مشورہ دیا تھا کہ اعتراف جرم نہ کروں اور کرکٹ بورڈ سے رابطے ختم کردوں۔

(جاری ہے)

خیال رہے کہ مانچسٹر کراؤن کورٹ نے ناصرجمشید کو اسپاٹ فکسنگ پر 17 ماہ قید کی سزا سنائی تھی جبکہ پاکستان کرکٹ بورڈ کے انسداد کرپشن یونٹ نے تحقیقات کے بعد ان پر 10 برس تک کرکٹ کھیلنے پر پابندی عائد کی تھی۔برطانیہ کی نیشنل کرائم ایجنسی میں ہونے والی تفتیش کے بعد سابق پاکستانی بلے باز ناصر جمشید کو 2017 میں گرفتار کیا گیا تھا۔