وزیرِ خزانہ اورنگزیب کی قیادت میں پاکستانی وفد کی امریکی محکمہ تجارت میں امریکی سیکرٹری تجارت ہاورڈ اے لٹنک سے ملاقات، سرمایہ کاری پر گفتگو

ہفتہ 21 فروری 2026 21:13

اسلام آباد (اُردو پوائنٹ اخبارتازہ ترین - این این آئی۔ 21 فروری2026ء) وزیرِ خزانہ و محصولات سینیٹر محمد اورنگزیب کی قیادت میں پاکستانی وفد نے واشنگٹن ڈی سی میں امریکی محکمہ تجارت میں امریکی سیکرٹری تجارت ہاورڈ اے لٹنک سے ملاقات کی۔وزیرِ خزانہ کے ہمراہ سیکرٹری تجارت، امریکا میں پاکستان کے سفیر اور تجارتی و اقتصادی وزرا بھی موجود تھے۔ یہ بات ہفتہ کو وزارتِ خزانہ کی جانب سے جاری بیان میں بتائی گئی۔

دونوں جانب سے تجارت اور سرمایہ کاری کے شعبوں بالخصوص اقتصادی تعاون کو مزید فروغ دینے کی خواہش کا اظہار کیا گیا۔ اس کے علاوہ امریکا کی جانب سے آئی سی ٹی، کان کنی اور توانائی کے شعبوں میں سرمایہ کاری میں دلچسپی پر بھی تبادلہ خیال کیا گیا۔وزیرِ خزانہ نے 31 مارچ 2026 کو منعقد ہونے والے امریکہ-پاکستان تجارتی و سرمایہ کاری فورم کے انعقاد پر امریکی چیمبر آف کامرس کے کردار کو سراہا۔

(جاری ہے)

اس فورم میں دونوں ممالک کی معروف کمپنیوں کے نمائندے اور پاکستان و امریکا کی وزارتی سطح کی قیادت شرکت کرے گی۔وزیرِ خزانہ نے امید ظاہر کی کہ امریکی سیکرٹری تجارت کا دفتر بھی اس فورم میں شرکت کرے گا۔دونوں فریقین نے آئندہ مہینوں میں بڑے منصوبوں میں سرمایہ کاری سے متعلق روابط کو مزید آگے بڑھانے کے عزم کا اعادہ کیا۔