خبردار،آج اپریل فول ڈے منایا جائے گا، ذرا بچ کے

مذاق کی آڑ میں سنجیدہ خدشات کا سلسلہ یورپ سے شروع ہوا، ماہرین کا محتاط رویہ اپنانے کا مشورہ

منگل 31 مارچ 2026 13:55

حجرہ شاہ مقیم (اُردو پوائنٹ اخبارتازہ ترین - این این آئی۔ 31 مارچ2026ء) دنیا بھر کی طرح پاکستان میں بھی یکم اپریل کو اپریل فول ڈے منایا جاتا ہے جسے مزاح اور تفریح کا دن قرار دیا جاتا ہے تاہم اس کے سماجی اثرات پر مختلف آرا سامنے آ رہی ہیں۔کوئی آپ کو غلط اطلاع دیکر پریشان بھی کر سکتا ہے اس لیے محتاط رہیے یکم اپریل کو اپنے عزیزوں ،دوستوں اور رشتہ داروں سے متعلق ملنے والی کسی بھی اطلاع ،خبریا موبائل کال پر فوری یقین کرنے کی بجائے تصدیق کر لیں، مورخین کے مطابق اس دن کا آغاز سولہویں صدی کے یورپ سے ہوا جب فرانس میں کیلنڈر کی تبدیلی کے بعد کچھ لوگ اپریل میں نیا سال مناتے رہے جنہیں مذاق کا نشانہ بنایا گیا اور یوں یہ روایت پروان چڑھی۔

جدید دور میں سوشل میڈیا کے باعث اپریل فول کے رجحان میں اضافہ ہوا ہے جہاں جعلی خبریں اور ویڈیوز کے ذریعے لوگوں کو حیران کیا جاتا ہے۔

(جاری ہے)

ماہرین کا کہنا ہے کہ بعض اوقات غیر ذمہ دارانہ مذاق افواہوں اور غلط فہمیوں کو جنم دے سکتا ہے جس سے معاشرتی مسائل پیدا ہو سکتے ہیں۔ پاکستان میں بھی نوجوان طبقہ اس دن کو مناتا ہے تاہم مذہبی و سماجی حلقے اسے غیر ضروری اور بعض اوقات غیر اخلاقی قرار دیتے ہیں۔ علما کرام کے مطابق جھوٹ بولنا کسی بھی صورت مناسب نہیں چاہے وہ مذاق ہی کیوں نہ ہو۔ ماہرین نے زور دیا ہے کہ ایسے رجحانات کی روک تھام کیلئے عوام میں شعور اجاگر کیا جائے اور مثبت و بے ضرر تفریح کو فروغ دیا جائے تاکہ کسی کی دل آزاری یا نقصان نہ ہو۔