خواجہ آصف ،خالد مقبول صدیقی و دیگر سیاسی رہنماؤں کی سید عمران احمد شاہ کی رہائش گاہ آمد، والدہ کے انتقال پر اظہار تعزیت

جمعرات 16 اپریل 2026 22:15

اسلام آباد(اُردو پوائنٹ اخبارتازہ ترین - این این آئی۔ 16 اپریل2026ء) وفاقی وزیر دفاع خواجہ محمد آصف ، وزیرتعلیم و پیشہ وارانہ تربیت خالد مقبول صدیقی اور دیگر سیاسی رہنماؤں نے جمعرات کووفاقی وزیر برائے تخفیف غربت و سماجی تحفظ سید عمران احمد شاہ کی اسلام آباد میں رہائش گاہ کا دورہ کیا اور ان کی والدہ کے انتقال پر اظہارِ تعزیت کیا۔وفاقی وزیرتعلیم و پیشہ وارانہ تربیت خالد مقبول صدیقی کی قیادت میں سید عمران احمد شاہ کی قیادت میں ملاقات کے لئے آنے والے وفد میں اراکین قومی اسمبلی امین الحق، جاوید حنیف، سبین غوری اور دیگر معزز شخصیات شامل تھیں۔

وفد نے وفاقی وزیر سے ملاقات کی، دلی ہمدردی اور افسوس کا اظہار کیا اور ان کی والدہ کے ایصالِ ثواب کے لیے فاتحہ خوانی کی۔

(جاری ہے)

اس موقع پر مرحومہ کے بلندی درجاتِ ، مغفرت اور جنت الفردوس میں اعلی مقام جبکہ سوگوار خاندان کے لیے صبرِ جمیل کی بھی دعا کی ۔ دریں اثنا وفاقی وزیر دفاع خواجہ آصف بھی سید عمران احمد شاہ کی رہائش گاہ پر پہنچے اور ان کی والدہ کے انتقال پر گہرے دکھ اور افسوس کا اظہار کیا۔

خواجہ آصف نے مرحومہ کے ایصالِ ثواب کے لیے فاتحہ خوانی کی اور دعا کی کہ اللہ تعالی مرحومہ کو جنت الفردوس میں اعلی مقام عطا فرمائے، جبکہ اہلِ خانہ کے لیے صبرِ جمیل کی بھی دعا کی۔انہوں نے سید عمران احمد شاہ سے اظہارِ ہمدردی کرتے ہوئے کہا کہ وہ اس غم کی گھڑی میں ان کے ساتھ کھڑے ہیں اس موقع پر سید عمران احمد شاہ نے بھی اظہارِ تعزیت کے لئے آنے والے وفود کے ساتھ ان کا شکریہ ادا کیا۔