کراچی میں لینڈمافیا حکومتی سرپرستی میں ہاؤسنگ سوسائٹیز پر قبضے کر رہی ہے ، منعم ظفر

کراچی(اُردو پوائنٹ اخبارتازہ ترین - این این آئی۔ 18 اپریل2026ء) امیر جماعت اسلامی کراچی منعم ظفر خان نے کہا ہے کہ کراچی میں کوآپریٹو ہاؤسنگ سوسائٹیز پر حکومتی سرپرستی میں لینڈ مافیا کے قبضے جا ری ہیں۔ سوسائٹیز پر قبضے سرکاری اداروں کی ملی بھگت سے کیے جا رہے ہیں، جعلی فائلیں اور فرضی لسٹیں بنا کر اصل مالکان کو بے دخل کر دیا گیاہے۔کراچی کے شہری آج اپنی جان و مال اور جائیداد کے تحفظ سے محروم ہو چکے ہیں۔

ایک عام آدمی اپنی زندگی بھر کی جمع پونجی سے پلاٹ خریدتا ہے تاکہ اپنے خاندان کے لیے ایک چھت فراہم کر سکے، مگر قبضہ مافیا اسے بھی چھین لیتی ہے۔جماعت اسلامی سوسائٹیز پر قبضوں اور عوام کو ان کے حق سے محروم کرنے کے خلاف ہر سطح پر جدوجہد جاری رکھے گی اور متاثرہ شہریوں کو تنہا نہیں چھوڑے گی۔

(جاری ہے)

ہماری قیادت اور کارکنان ہر محاذ پر عوام کے ساتھ کھڑے ہیں ، کراچی کے عوام اس جدوجہد میں ہمارا ساتھ دیں تاکہ اجتماعی طاقت سے اس کا حل ممکن بنایا جا سکے۔

ان خیالات کا اظہار انہوں نے پبلک ایڈ کمیٹی جماعت اسلامی ضلع شرقی کے تحت دفتر ضلع میں قریشی سوسائٹی متاثرین کے اجلاس سے خصوصی خطاب کرتے ہوئے کیا ۔اجلاس سے امیر ضلع نعیم اختر، پبلک ایڈ کمیٹی کراچی کے سکریٹری نجیب ایوبی اورصدر پبلک ایڈ کمیٹی ضلع شرقی سید قطب احمد نے بھی خطاب کیا ۔اس موقع پر متاثرین نے منعم ظفر خان کو سوسائٹی پر قبضے کے حوالے سے تفصیل سے آگاہ کیا ۔

منعم ظفر خان نے مزیدکہاکہ جماعت اسلامی نے ہمیشہ عوام کے مسائل کو اپنی ذمہ داری سمجھتے ہوئے ان کے حل کے لیے آگے بڑھ کر آواز اُٹھائی ہے اور عملی اقدامات کیے ہیں۔ جب بحریہ ٹاؤن کے متاثرین کے چیکس باؤنس ہو رہے تھے اور انہیں اپنی زمینوں کا قبضہ نہیں مل رہا تھا، تو جماعت اسلامی کی ٹیم نے دن رات محنت کر کے بحریہ ٹائون کے ذمہ داران سے مذاکرات کیے، معاہدے کروائے اور متاثرین کو اربوں روپے واپس دلوائے۔

منعم ظفر خان نے کہا کہ کراچی کے شہری بڑھتے ٹریفک حادثات، اسٹریٹ کرائم، پانی، بجلی ،سڑکوں کی خستہ حالی ، صفائی ستھرائی و کچرے کے ڈھیروں اور انفراسٹرکچر سمیت دیگر مسائل سے دوچار ہیں اور بنیادی سہولیات کی عدم فراہمی نے شہریوں کی زندگی اجیرن بنا رہی ہے۔کراچی ملک کی معیشت میں ریڑھ کی ہڈی کی حیثیت رکھتا ہے، مگر افسوس کہ اسی شہر کو بنیادی حقوق سے محروم رکھا جا رہا ہے۔ کراچی کو اس کا جائز حق دیا جائے اور شہریوں کو بنیادی سہولیات کی فراہمی یقینی بنائی جائے۔جماعت اسلامی ہر فورم پر خواہ و ہ عدالت ہو یا عوامی سطح کی جدوجہد اور احتجاج ، شہریوں کے ساتھ کھڑی رہے گی اور ان کے حقوق کے حصول تک اپنی جدوجہد جاری رکھے گی۔