ایچ بی ایل پی ایس ایل11 ،حیدرآباد کنگز مین کی شاندار واپسی

بدھ 29 اپریل 2026 18:14

لاہور (اُردو پوائنٹ اخبارتازہ ترین - اے پی پی۔ 29 اپریل2026ء) حیدرآباد کنگز مین کی ایچ بی ایل پی ایس ایل11 میں مہم ایک حوصلے، یقین اور شاندار واپسی سے بھرپور رہی۔ٹورنامنٹ شروع ہونے سے پہلے فروخت ہونے والی فرنچائز ٹیم سے بڑی توقعات وابستہ تھیں، مگر جب دفاعی چیمپئن لاہور قلندرز کے خلاف پہلے میچ میں69 رنز سے شکست ہوئی۔ دوسرے میچ میں بھی کوئٹہ گلیڈی ایٹرز سے ہار نے ٹیم کو مزید دبائو میں ڈال دیا۔

دو مسلسل شکستوں کے باوجود ٹیم کے اندر اعتماد برقرار رہا۔ کھلاڑیوں اور مینجمنٹ نے عمل پر یقین رکھنے اور سکواڈ کی صلاحیتوں پر بھروسہ جاری رکھا، جس سے ٹیم میں بہتری کے آثار نظر آنے لگے۔ پلیئنگ الیون میں حکمت عملی کے تحت تبدیلیاں کی گئیں اور مقابلے زیادہ سخت ہوتے گئے۔

(جاری ہے)

کراچی کنگز کے خلاف189 رنز کا ہدف حاصل کرتے ہوئے حیدرآباد نے ٹورنامنٹ میں اپنی پہلی کامیابی حاصل کی۔

اس جیت کے بعد ٹیم کا اعتماد بڑھا اور مسلسل تین مزید کامیابیاں حاصل کیں، جن میں ملتان سلطانز کے خلاف214 رنز کا شاندار ہدف بھی شامل تھا۔ ابتدائی مشکلات کے بعد حیدرآباد کنگز مین ایک مضبوط پلے آف امیدوار بن کر ابھری۔ تاہم آخری مرحلے میں اسلام آباد یونائیٹڈ کے خلاف بھاری شکست نے نیٹ رن ریٹ کو متاثر کیا اور کوالیفائی کرنے کے لیے آخری میچ میں راولپنڈیز کو80 سے زائد رنز سے شکست دینا ضروری ہوگیا۔

ٹیم نے شاندار کارکردگی دکھائی۔ گلین میکسویل نے37 گیندوں پر70 رنز کی جارحانہ اننگز کھیلی جبکہ عثمان خان اور کوسل پریرا نے تیز نصف سنچریاں سکور کیں۔ حسن خان نے صرف 4 گیندوں پر 16 رنز بنا کر ٹیم کا مجموعہ244 تک پہنچا دیا۔ہدف کے دفاع میں بولرز نے بھی بہترین کارکردگی دکھائی۔ اگرچہ راولپنڈیز نے ایک موقع پر56 رنز پر ایک وکٹ گنوائی تھی، لیکن حنین شاہ اور عاکف جاوید نے شاندار بولنگ کرتے ہوئے پوری ٹیم کو136 رنز پر آئوٹ کر دیا۔ یوں 4 ابتدائی شکستوں کے بعد حیدرآباد کنگز مین نے شاندار واپسی کرتے ہوئے پلے آف مرحلے تک رسائی حاصل کی اور ناقدین کو میدان میں اپنی کارکردگی سے جواب دیا۔