رکنِ قومی اسمبلی صوفیہ سعید شاہ کی غیر اعلانیہ لوڈشیڈنگ پر کے الیکٹرک حکام سے ملاقات

جمعرات 30 اپریل 2026 16:24

کراچی (اُردو پوائنٹ اخبارتازہ ترین - این این آئی۔ 30 اپریل2026ء) رکنِ قومی اسمبلی صوفیہ سعید شاہ نے برنس روڈ ٹاؤن میں غیر اعلانیہ لوڈشیڈنگ اور فیڈر تبدیلی کے مسائل کے حوالے سے کے الیکٹرک کے آئی بی سی صدر آفس میں عبدالقدوس اور دیگر اعلی افسران سے تفصیلی ملاقات کی۔ یہ ملاقات تقریبا دو گھنٹے جاری رہی، جس میں صدر ٹاؤن کے مختلف علاقوں میں اعلانیہ اور غیر اعلانیہ لوڈشیڈنگ کے مسائل پر تفصیلی تبادلہ خیال کیا گیا۔

ملاقات کے دوران صوفیہ سعید شاہ نے کہا کہ متحدہ قومی موومنٹ پاکستان کے حق پرست نمائندگان عوام کی بے لوث خدمت پر یقین رکھتے ہیں اور انہیں فخر ہے کہ وہ پارٹی کے پلیٹ فارم سے عوامی خدمت انجام دے رہے ہیں۔انہوں نے کہا کہ وہ مین چیپا سینٹر، صدر، برنس روڈ سے ٹاور تک کے رہائشی اور کمرشل علاقوں کی نمائندگی کرتی ہیں۔

(جاری ہے)

حالیہ عوامی ملاقاتوں میں موصول ہونے والی شکایات کے حوالے سے انہوں نے عبدالقدوس سے تفصیلی گفتگو کی اور عوام کی جانب سے درج کروائی گئی شکایات کی مکمل تفصیلات طلب کیں۔

وفد نے علاقے سے غیر قانونی کنڈا سسٹم کے فوری خاتمے کا مطالبہ بھی کیا۔ اس موقع پر عبدالقدوس نے اپنے افسران کو بلنگ کی مکمل تفصیلات فراہم کرنے کی ہدایت دی اور یقین دہانی کرائی کہ مسائل کے حل کے لیے مشترکہ حکمتِ عملی پر کام کیا جائے گا۔ملاقات میں ٹان جوائنٹ انچارج ہاورڈ جون، نبیل الرحمن، عامر بابا، حسنین عرفان اور ایم این اے صوفیہ سعید شاہ کے کوآرڈینیٹر شاکر صابر بھی موجود تھے۔

اس موقع پر ٹاؤن جوائنٹ انچارج ہاورڈ جون نے علاقہ مکینوں کی نمائندگی کرتے ہوئے افسران کو زمینی حقائق اور عوامی مسائل سے تفصیلی آگاہ کیا۔ملاقات کے اختتام پر صوفیہ سعید شاہ اور ٹان ذمہ داران نے اعلی افسران کے تعاون پر ان کا شکریہ ادا کیا اور اپنی جانب سے مکمل تعاون کی یقین دہانی کرائی۔