فلیئر ٹریول آئی ٹی ایف مینز فیوچرز ایم-15 (لیگ-1) ٹورنامنٹ پی ٹی ایف ٹینس کمپلیکس میں جاری

اسلام آباد (اُردو پوائنٹ اخبارتازہ ترین - اے پی پی۔ 30 اپریل2026ء) فلیئر ٹریول آئی ٹی ایف مینز فیوچرز ایم-15 (لیگ-1) ٹورنامنٹ پی ٹی ایف ٹینس کمپلیکس اسلام آباد میں جاری ہے۔ یہ ٹورنامنٹ برصغیر کے ممتاز سابق ٹینس کھلاڑی خواجہ افتخار احمد کی یاد میں منعقد کیا جا رہا ہے، خواجہ افتخار احمد کو یہ منفرد اعزاز حاصل ہے کہ وہ واحد کھلاڑی ہیں جو قیام پاکستان سے قبل متحدہ ہندوستان میں نمبر 1 رہے اور آزادی کے بعد پاکستان میں ایک دہائی تک نمبر 1 پوزیشن پر فائز رہے، کھیل کے لیے ان کی شاندار خدمات کے اعتراف میں انہیں 1964 میں فیلڈ مارشل ایوب خان کی جانب سے صدارتی تمغہ ’’پرائیڈ آف پرفارمنس‘‘ سے نوازا گیا۔

اس باوقار بین الاقوامی ایونٹ میں 23 ممالک کے مجموعی طور پر 70 مرد کھلاڑی حصہ لے رہے ہیں۔

(جاری ہے)

شرکت کرنے والے ممالک میں پاکستان، کویت، روس، ازبکستان، سویڈن، آسٹریلیا، ملائیشیا، برطانیہ، اٹلی، لتھوانیا، چین، ترکی، الجزائر، کینیڈا، امریکہ، آئرلینڈ، پولینڈ، ہانگ کانگ، نیپال، یونان، سعودی عرب، لبنان اور جاپان شامل ہیں۔ ٹورنامنٹ کے ٹاپ سیڈ سویڈن کے لیو بورگ ہیں جن کی اے ٹی پی رینکنگ 483 ہے جبکہ سیکنڈ سیڈ الجزائر کے سمیر حمزہ رگیگ ہیں جن کی اے ٹی پی رینکنگ 844 ہے۔

پاکستان کے صف اول کے کھلاڑی محمد شعیب نے آئی ٹی ایف ایم-15 اسلام آباد کے دوسرے رائونڈ میں شاندار کارکردگی کا مظاہرہ کیا۔ لتھوانیا کے ماتاس کے خلاف کھیلتے ہوئے شعیب نے پہلے ہی پوائنٹ سے مکمل کنٹرول دکھایا۔ انہوں نے پہلا سیٹ 6-0 سے باآسانی جیت لیا اور اپنی مہارت، طاقت اور اعتماد سے حریف کو کوئی موقع نہ دیا۔ دوسرے سیٹ میں بھی وہ اسی رفتار سے کھیلتے ہوئے 4-1 کی برتری حاصل کر چکے تھے کہ ماتاس انجری کے باعث میچ جاری نہ رکھ سکے، یوں شعیب نے زبردست فتح حاصل کی۔

اس کامیابی کے ساتھ شعیب نے کوارٹر فائنل کے لیے کوالیفائی کر لیا جو نہ صرف ان کے لیے بلکہ پاکستانی ٹینس کے لیے بھی ایک اہم سنگ میل ہے۔ ان کی یہ کامیابی اس بات کا ثبوت ہے کہ مقامی کھلاڑی عالمی سطح پر اپنے ہی ملک میں بہتر کارکردگی دکھا رہے ہیں۔ ڈبلز کوارٹر فائنل میں تجربہ کار عقیل خان نے ابھرتے ہوئے کھلاڑی برکت اللہ کے ساتھ مل کر مضبوط اور متوازن کھیل پیش کیا۔

پاکستانی جوڑی نے کینیڈا کے ایڈم فراگ-کائو اور برطانیہ کے کارل ہولڈر کو ایک دلچسپ مقابلے کے بعد شکست دی۔ پہلے سیٹ میں 6-1 سے کامیابی کے بعد دوسرے سیٹ میں انہیں سخت مقابلہ کرنا پڑا اور وہ 4-6 سے ہار گئے تاہم میچ ٹائی بریک میں شاندار کم بیک کرتے ہوئے 10-5 سے فتح حاصل کی۔ اس کامیابی کے ساتھ عقیل خان اور برکت اللہ نے سیمی فائنل کے لیے کوالیفائی کر لیا ہے اور ڈبلز ایونٹ میں پاکستان کی امیدیں برقرار ہیں۔

نتائج کے مطابق مردوں کے سنگلز پری کوارٹر فائنلز میں محمد شعیب (پاکستان) نے ماتاس واسلیاوسکس (لتھوانیا) کو 6-0، 4-1 (ریٹائرڈ) سے شکست دی، مرت ناجی ترکر (ترکی) نے ابوبکر طلحہ (پاکستان) کو 6-3، 6-4 سے شکست دی، نکیتا ایانن (روس) نے برکت اللہ (پاکستان) کو 6-2، 6-0 سے شکست دی، فانمنگ مینگ (چین) نے عیسیٰ قبازرد (کویت) کو 6-4، 6-3 سے شکست دی، آرود نورڈکوسٹ (سویڈن) نے درشن سریش (ملائیشیا) کو 6-3، 6-3 سے شکست دی۔

سمیر حمزہ رگیگ (الجزائر) نے الیکسی دوبینن (روس) کو 6-0، 6-3 سے شکست دی، لیو بورگ (سویڈن) نے عابد علی اکبر خان (پاکستان) کو 6-4، 6-4 سے شکست دی، کیرے یلماز (ترکی) نے دمتری شیروکی کو 3-6، 7-5، 7-5 سے شکست دی، مردوں کے ڈبلز کوارٹر فائنلز میں عقیل خان / برکت خان (پاکستان) نے ایڈم فراگ-کائو (کینیڈا) /کارل ہولڈر (برطانیہ) کو 6-1، 4-6، (10-5) سے شکست دی، ایوان ایوتکن / الیکسی دوبینن (روس) نے ابوبکر طلحہ /احمد نائل قریشی (پاکستان) کو 4-6، 6-3، 10-5 سے شکست دی۔