دنیا پاکستان کے ساتھ جڑنا فخر سمجھتی ، سرحد پار صرف تنہائی اور بدنامی ہے، عطا تارڑ

پاکستان نے اپنی پالیسیوں اور اقدامات سے عالمی سطح پر مثبت پہچان بنائی ہے، وفاقی وزیر اطلاعات ہمسایہ ملک گانے یا فلمیں بنا کر جنگ نہیں جیت سکتا ، ہمارے جے 10اور فتح نے شائننگ کو راکھ میں ملا دیا،تقریب سے خطاب

ہفتہ 2 مئی 2026 17:00

اسلام آباد(اُردو پوائنٹ اخبارتازہ ترین - این این آئی۔ 02 مئی2026ء) وفاقی وزیر اطلاعات عطا اللہ تارڑ نے کہا ہے کہ دنیا پاکستان کے ساتھ جڑنا فخر سمجھتی ہے ، سرحد پار صرف تاریکی، تنہائی اور بدنامی ہے،پاکستان نے اپنی پالیسیوں اور اقدامات سے عالمی سطح پر مثبت پہچان بنائی ہے۔معرکہ حق کی یادگاری تقریب سے خطاب کرتے ہوئے انہوں نے کہا کہ آج پاکستان کی دنیا میں عزت اور مقام ہے ، عالمی سطح پر لوگ پاکستان کے ساتھ خود کو منسلک کرنا فخر سمجھتے ہیں جب کہ سرحد کے اس پار تاریکی، تنہائی اور بدنامی ہے،پاکستان نے اپنی پالیسیوں اور اقدامات سے عالمی سطح پر مثبت پہچان بنائی ہے۔

انہوں نے کہا کہ ہمارے جے 10اور فتح نے شائننگ کو راکھ میں ملا دیا، پہلگام واقعہ بھونڈے طریقے سے کیا گیا،وزیراعظم شہباز شریف نے کاکول اکیڈمی میں اس واقعے کی آزادانہ تحقیقات کی پیشکش کی تھی، پاکستان میں دہشت گردی کے واقعات کے باوجود ہمسایہ ملک نے کبھی مذمت تک نہیں کی۔

(جاری ہے)

عطا اللہ تارڑ نے کہا کہ اے پی ایس اور جعفر ایکسپریس جیسے واقعات دنیا میں کم ہی دیکھنے کو ملتے ہیں،پاکستان نے کلبھوشن کو رنگے ہاتھوں گرفتار کیا۔

انہوںنے کہاکہ ہمسایہ ملک گانے یا فلمیں بنا کر جنگ نہیں جیت سکتا ، پاکستان نے عملی میدان میں کامیابیاں حاصل کی ہیں۔وزیر اطلاعات نے کہا کہ پاکستان نے جنگ میں ایک طیارہ مار گرایا اور پائلٹ کو گرفتار کیا تاہم وہی پائلٹ واپس جا کر ایوارڈ لیتا ہے۔ انہوں نے کہا کہ بھارت دہشت گردی کو فروغ دیتا ہے،کینیڈا میں بھی ایسے واقعات سامنے آئے ہیں۔

عطا اللہ تارڑ نے کہا کہ پاکستان کی نئی نسل نے بھارتی میڈیا کو موثر جواب دیا، پاکستان نے بھارتی یوٹیوب چینلز بند نہیں کیے، پاکستان نے جنگ کے دوران ان کے 8طیارے مار گرائے ، ائیر چیف نے بہترین حکمت عملی اپنائی جبکہ بھارتی افواج 4دن کی بڑھکوں کے بعد 4گھنٹوں میں پسپا ہو گئیں۔انہوں نے کہا کہ پاکستانی میڈیا نے بھی اس جنگ میں انتہائی سنجیدہ کردار ادا کیا اور بیانیے کی جنگ میں کامیابی حاصل کی،ہمارا مستقبل روشن ہے ، پاکستان ترقی کی راہ پر گامزن ہے۔

وزیر اطلاعات نے کہا کہ ڈی جی آئی ایس پی آر لیفٹیننٹ جنرل احمد شریف کو بھی خراج تحسین پیش کرتا ہوں۔انہوں نے کہا کہ بھارتی میڈیا نے ہمیں مزاحیہ کانٹینٹ فراہم کیا،بھارتی میڈیا نے ہمارے لاہور اور اسلام آباد کی بندرگاہیں تباہ کردی، ہم نے اپنے ملی نغمے بھارتی یوٹیوب چینل پر چلا دئیے، 1965کی جنگ میں میڈم نور جہاں نے اپنے ملی نغموں سے افواج پاکستان کا لہو گرمایا تھا،اس مرتبہ ہمارے جین زی کی سوشل میڈیا اسٹریٹیجی کامیاب رہی۔