Live Updates

دنیا کے طاقتور اور کمزور پاسپورٹس کی فہرست جاری، سنگاپور کا پہلا نمبر

پاکستانی پاسپورٹ کے حامل افراد کو 31 ممالک میں ویزا فری انٹری کی سہولت حاصل

اتوار 3 مئی 2026 17:50

لاہور(اُردو پوائنٹ اخبارتازہ ترین - این این آئی۔ 03 مئی2026ء) عالمی ادارے ہینلے پاسپورٹ انڈیکسکی جانب سے دنیا کے طاقتور پاسپورٹس کی فہرست جاری کر دی گئی ہے جس میں سنگاپور بدستور پہلے نمبر پر موجود ہے،سنگاپور کے شہری بغیر ویزا 192 ممالک کا سفر کر سکتے ہیں جو عالمی سطح پر سب سے زیادہ رسائی ہے۔دوسرے نمبر پر تین ممالک جاپان، جنوبی کوریا اور متحدہ عرب امارات مشترکہ طور پر موجود ہیں جن کے شہری 187 ممالک تک ویزا فری رسائی رکھتے ہیں،اس کے بعد ناروے اور سوئٹزرلینڈ 185 ممالک کے ساتھ نمایاں ہیں۔

رپورٹ کے مطابق یورپی ممالک مجموعی طور پر پاسپورٹ طاقت میں سرفہرست ہیں جبکہ یورپی یونین کا اوسط 183 ممالک تک ویزا فری رسائی بنتا ہے جو ملائیشیا ء اور برطانیہ کے برابر ہے۔دوسری جانب کمزور پاسپورٹس کی فہرست میں افغانستان سب سے نچلے نمبر پر ہے، جہاں شہری صرف 23 ممالک تک بغیر ویزا سفر کر سکتے ہیں۔

(جاری ہے)

کمزور ترین پاسپورٹس میں دوسرا نمبر شام کے پاسپورٹ کا ہے، عراق کا تیسرا نمبر ہے جبکہ پاکستان کا کمزور ترین پاسپورٹس میں چوتھا نمبر ہے، پاکستانی پاسپورٹ کے حامل افراد کو 31 ممالک میں ویزا فری انٹری کی سہولت حاصل ہے۔

رپورٹ کے مطابق کمزور پاسپورٹس رکھنے والے ممالک میں سیاسی عدم استحکام، تنازعات اور ہجرت کے بڑھتے رجحانات جیسے عوامل اہم کردار ادا کرتے ہیں، جس کے باعث ان ممالک کے شہریوں پر ویزا پابندیاں زیادہ ہوتی ہیں۔