منعم ظفر نے بغدادی لیاری میں عبد الستار افغانی ڈسپنسری کا افتتاح کردیا

کراچی(اُردو پوائنٹ اخبارتازہ ترین - این این آئی۔ 03 مئی2026ء) امیر جماعت اسلامی کراچی منعم ظفر خان نے امیر ضلع جنوبی سفیان دلاورکے ہمراہ یوسف ہارون روڈ بغدادی، لیاری میں سابق میئر کراچی عبدالستار افغانی ڈسپنسری کا افتتاح کردیا ، افتتاحی تقریب میں امیر جماعت اسلامی ضلع جنوبی سفیان دلاور، نائب امیر ضلع جنوبی سید جواد شعیب ،معاون امیرضلع جنوبی فضل الرحمن، سابق میئر کراچی عبد الستارافغانی کے صاحبزادے عبدالعزیز افغانی بھی موجود تھے۔

منعم ظفر خان نے افتتاحی تقریب سے خطاب کرتے ہوئے کہاکہ عبدالستار افغانی کی شخصیت کسی تعارف کی محتاج نہیں۔ وہ خدمت، دیانت اور عوامی جدوجہد کا استعارہ تھے۔ ان کی سیاسی جدوجہد کا آغاز بھی لیاری سے ہوا اور انہوں نے ہمیشہ عوامی خدمت کو ترجیح دی۔

(جاری ہے)

آج ان کے نام سے ڈسپنسری کا قیام دراصل ان کی عوامی خدمات کو خراجِ تحسین پیش کرنے کے مترادف ہے۔

جماعت اسلامی خدمت، امانت اور دیانت کی علامت ہے۔ جماعت اسلامی اقتدار اور وسائل کے بغیر بھی عوامی خدمت کا فریضہ سرانجام دے رہی ہے، جبکہ پیپلزپارٹی کی صوبائی حکومت سندھ میں 18سال سے قابض ہے لیکن عوام کو بنیادی سہولیات فراہم کرنے میں ناکام رہی ہے۔ منعم ظفر خان نے کہا کہ سوئی سدرن گیس کے اربوں روپے اور لیاری ٹرانسفارمیشن پروجیکٹ کے نام پر اربوں روپے مختص کیے گئے، مگر عوام آج بھی سہولیات سے محروم ہیں۔

یہ سوال اپنی جگہ موجود ہے کہ یہ وسائل کہاں خرچ ہوئی لیاری کبھی فٹبال، باکسنگ اور سائیکلنگ کا مرکز تھا، مگر حکمرانوں کی نااہلی اور بے حسی کے باعث آج یہاں کے نوجوان سہولیات سے محروم ہیں، کھیلوں کے میدان تباہ حال ہیں اور منشیات فروش نوجوان نسل کو تباہ کر رہے ہیں۔’’حق دو لیاری تحریک ‘‘اور ’’حق دو کراچی تحریک ‘‘دراصل مظلوم عوام کی آواز ہے۔

جماعت اسلامی لیاری کے عوام کو دعوت دیتی ہے کہ وہ ظلم، ناانصافی اور استحصال کے خلاف اس جدوجہد میں شامل ہوں۔جماعت اسلامی کا ساتھ دیں، جماعت اسلامی کے ممبر بنیں اور نظام کی تبدیلی کی جدوجہد میں شریک ہوں تاکہ لیاری اور کراچی کو حقیقی معنوں میں ترقی یافتہ، روشن اور خوشحال بنایا جا سکے۔انہوں نے کہا کہ جماعت اسلامی مسلسل عوامی خدمت کے مختلف منصوبوں پر کام کر رہی ہے۔

ہیلتھ کلینکس، فلاحی میڈیکل کیمپس، آنکھوں کے علاج کے لیے سہولتیں، فلٹر پلانٹس، بیٹھک اسکول، سلائی کڑھائی مراکز، یتیم بچوں کی کفالت اور دیگر فلاحی منصوبے اس بات کا ثبوت ہیں کہ جماعت اسلامی صرف دعوے نہیں بلکہ عملی خدمت پر یقین رکھتی ہے۔منعم ظفر خان نے کہا کہ اگر جماعت اسلامی محدود وسائل کے باوجود عوام کی خدمت کر سکتی ہے تو پھر وہ حکمران جماعتیں، جو گزشتہ کئی دہائیوں سے اقتدار پر قابض ہیں، لیاری اور کراچی کے عوام کو بنیادی سہولیات کیوں فراہم نہیں کر سکیں لیاری آج بھی بنیادی سہولیات سے محروم ہے۔

نہ معیاری تعلیمی ادارے موجود ہیں، نہ صحت کے مراکز، نہ بہتر سڑکیں اور نہ ہی پانی و بجلی کی مناسب فراہمی۔ 12,12اور 15,15گھنٹے کی لوڈشیڈنگ، پانی کی قلت، تباہ حال انفراسٹرکچر اور کھیلوں کے میدانوں کی زبوں حالی حکمرانوں کی ناکامی کا واضح ثبوت ہے۔