منعم ظفر نے ماڈل ٹائون میں 1000نئی سڑکوں و گلیوں کے تعمیراتی منصوبے کا افتتاح کر دیا

کراچی (اُردو پوائنٹ اخبارتازہ ترین - این این آئی۔ 04 مئی2026ء) امیر جماعت اسلامی کراچی منعم ظفر خان نے امیر ضلع ائیر پورٹ محمد اشرف اور وائس ٹائون چیئر مین ماڈل کالونی فیصل باسط کے ہمراہ پیر کے روز ٹائون کے تحت 1000نئی سڑکوںو گلیوں کی تعمیر کے منصوبے کا افتتاح کر دیا ، اس موقع پر میڈیا کے نمائندوں سے گفتگو کرتے ہوئے کہا کہ ماڈل ٹاؤن کی جانب سے 1000سڑکوں کی تعمیر اور ٹائون کو ماڈل بنانے کے عزم پر جماعت اسلامی کے منتخب نمائندے لائق تحسین ہیں ، ہمارے نمائندوں نے ان نامساعد حالات کے باوجود عوامی خدمت کر کے امید کی شمع روشن کی ہے اور معیار،بروقت تکمیل ، شفافیت پر کوئی سمجھوتہ نہیں کیا، ماڈل ٹائون میں 44کلو میٹر سڑکیں و گلیاں تعمیر کی ہیں، دعوے سے کہتے ہیں کہ پیپلز پارٹی اپنا ایک ٹاؤن بھی جماعت اسلامی کے 9 ٹاؤنز کے سامنے پیش نہیں کرسکتی، کیونکہ جہاں رشوت اور کرپشن کابازار گرم ہوتو وہاں ترقیاتی کام کیسے ہوسکتا ہے،نااہلی،کرپشن اور بدانتظامی کانام پیپلز پارٹی ہے، جماعت اسلامی نے ڈھائی سال کے مختصر وقت میں اپنے 9ٹائون میں 236پارکس بحال کیے ہیں،142000 اسٹریٹ لائٹس لگائی ہیں،اوپن ایئر جم،روڈ سائیڈ جنگل کا تصور پیش کیا،69سرکاری اسکولوں کو ماڈل اسکول بنایا،انہوںنے کہا کہ ماضی میں بھی عبدالستار افغانی اور نعمت اللہ خان کے ادوار میں کراچی میں بے مثال ترقیاتی کام ہوئے اور امانت ودیانت کے ساتھ خدمت کا فریضہ انجام دیا گیا، نعمت اللہ خان نے اپنے چار سالہ دور میں کراچی کو بے مثال ترقی دی، 32کالجز قائم کیے گئے،کراچی انسٹیٹیوٹ آف ہارٹ ڈیزیزکا تحفہ دیا، سڑکوں، پلوں اور انڈر پاسز کا جال بچھایا گیا، ماڈل پارکس بنائے گئے، پانی کا کے تھری منصوبہ وقت سے پہلے اور کم لاگت میں مکمل کیا،کے تھری منصوبے کے بعد ایک بوند کا بھی اضافہ نہیں ہوا،کے فور منصوبے کے مکمل ہونے میں پیپلز پارٹی رکاوٹ ہے،اس منصوبے کو بجلی مہیا کرنا پیپلز پارٹی کی ذمہ داری ہے، پیپلز پارٹی کی نا اہلی کے باعث آئندہ 3سال بھی اہل کراچی کو نلکوں میں پانی میسر نہیں آئے گا، ٹینکر مافیا کے ذریعے اربوں روپے لوٹے جاتے رہیں گے، 2.7کلو میٹر آگمینٹیشن کی لائن کاکام ورلڈ بنک کی ٹیم نے ناقص ہونے کی وجہ سے روک دیا ہے، 13ارب روپے کی لاگت سے حب کینال بنائی گئی لیکن اب تک اس کے اندر پانی نہیں چھوڑا گیا، بی آر ٹی ریڈ لائن پر پیپلز پارٹی ایف ڈبلیو او کے پیچھے چھپنے کی کوشش کررہی ہے ، اورنج لائن کے نام پر اورنگی ٹاؤن کے لوگوں کو دھوکہ دیا گیا،محمد اشرف نے کہا کہ ماڈل ٹائون سمیت ہمارے دیگر ٹائونز اور یوسیز میں منتخب بلدیاتی نمائندوں نے اختیارات کارونا رونے کے بجائے اختیارات سے بڑھ کر عوامی خدمت کو ہم نے اپنا نصب العین بنایا ہے ، عوام کے تعاون سے امانت و دیانت اور تعمیر نو کا یہ سفر جاری رہے گا۔

(جاری ہے)

پیپلز پارٹی اٹھارہ سال سے صوبے پر براجمان اور کراچی کے وسائل پر قابض ہے، اس نے پورے شہر کو کھنڈر بنادیا ہے،ماضی میں بھی جماعت اسلامی نے ہی کراچی کی تعمیر و ترقی میں اہم کردارا د کیا تھا ،آئندہ بھی جماعت اسلامی ہی عوام کے مسائل حل کرائے گی ،وائس ٹائون چیئر مین فیصل باسط نے ماڈل کالونی ٹائون میں کیے گئے تعمیراتی کام اور جاری ترقیاتی منصوبوں کی تفصیلات بتائے ہوئے کہا کہ انفرا اسٹرکچر اور سڑکوں و گلیوں کی تعمیر کے سلسلے میں 118کلو میٹر طویل سڑکوں کا جال بچھانے کا کام تیزی سے جاری ہے جبکہ 44کلو میٹر سڑکوں کی تعمیر مکمل ہو چکی ہے ،رواں سال کے آخر میں162کلو میٹر کام مکمل کر لیا جائے گا ، فراہمی و نکاسی آب کے حوالے سے 28ہزار رننگ فٹ پینے کے پانی اور 13ہزار 800رننگ فٹ سیوریج لائین بچھائی گئی ہیں جبکہ 10ہزار رننگ فٹ لائنوں کی صفائی و بحالی مکمل کی گئی ہے ، پورے ٹائون میں 7ہزار سے زائد اسٹریٹ لائٹس نصب اور 9پارک تعمیر نو اور تزئین و آرائش کے بعد بحال کر کے عوام کے لیے کھول دیے گئے ہیں ، تعمیر و ترقی کے سارے کام 40سالہ ماہر انجینئرز کی نگرانی میں BOQ کے معیار کے عین مطابق اور تمام 8یوسیز میں یکساں کیے جا رہے ہیں ، ایک مثالی ٹائون کی جانب ہمارا سفر جاری ہے ،۔