معرکہ حق کاایک سال مکمل ہونے پر ڈویژنل انتظامیہ بلتستان کے زیرِ اہتمام سکردو میں پُروقار تقریب

منگل 5 مئی 2026 20:10

استور (اُردو پوائنٹ اخبارتازہ ترین - اے پی پی۔ 05 مئی2026ء) 5 مئی کو معرکہ حق (آپریشن بنیان المرصوص) کے ایک سال مکمل ہونے کے موقع پر ڈویژنل انتظامیہ بلتستان کے زیرِ اہتمام سکردو میں ایک پُروقار تقریب منعقد کی گئی۔ اس سلسلے میں ڈویژنل کمپلیکس سکردو سے نیو یادگارِ شہداء تک ایک عظیم الشان ریلی نکالی گئی، جس میں کمشنر بلتستان ڈویژن کمال خان، ڈی آئی جی بلتستان رینج طفیل میر، ڈپٹی کمشنر سکردو حمزہ مراد سمیت مختلف سرکاری محکموں کے افسران، طلبہ، سیاسی و مذہبی شخصیات، اساتذہ، سول سوسائٹی، عمائدین علاقہ، میڈیا نمائندگان اور عوام کی بڑی تعداد نے شرکت کی۔

ریلی کا اختتام نیو یادگارِ شہداء پر مرکزی تقریب کی صورت میں ہوا۔تقریب کا آغاز پرچم کشائی سے ہوا، جہاں پولیس کے چاق و چوبند دستے نے سلامی پیش کی۔

(جاری ہے)

شہداء کے ایصالِ ثواب کے لیے فاتحہ خوانی کی گئی اور پھولوں کی چادر چڑھائی گئی، جبکہ قومی ترانے کے ساتھ تقریب کا باقاعدہ آغاز کیا گیا۔ اس موقع پر طلبہ نے ملی نغمے اور تقاریر پیش کیں، جبکہ معرکۂ حق کی مناسبت سے خصوصی کلام اور شاعری بھی پیش کی گئی، جسے حاضرین نے بے حد سراہا۔

تقریب سے خطاب کرتے ہوئے معروف محقق و سینئر صحافی قاسم نسیم نے معرکۂ حق کی تاریخی اور قومی اہمیت پر روشنی ڈالی۔ انہوں نے پاکستان کی مسلح افواج کو خراجِ تحسین پیش کرتے ہوئے کہا کہ پاکستان ایک مضبوط اور ناقابلِ تسخیر قوت ہے۔ انہوں نے مشرقِ وسطیٰ کی حالیہ صورتحال میں پاکستان کے مؤثر سفارتی کردار کو سراہتے ہوئے ملکی قیادت اور افواجِ پاکستان، بالخصوص فیلڈ مارشل عاصم منیر کی قیادت کو بھی خراجِ تحسین پیش کیا۔