آن لائن ٹیکسی سروسز کیلئے نیا سکیورٹی نظام متعارف

ڈرائیوز کیلئے پولیس کریکٹر سرٹیفکیٹ لازمی قرار، پولیس ہر ڈرائیور کی مکمل تفصیلات اپنے پاس رکھے گی

ساجد علی بدھ 6 مئی 2026 13:39

آن لائن ٹیکسی سروسز کیلئے نیا سکیورٹی نظام متعارف

لاہور (اُردو پوائنٹ اخبارتازہ ترین۔ 06 مئی2026ء) صوبہ پنجاب کے دارالحکومت لاہور میں آن لائن ٹیکسی سروسز استعمال کرنے والے شہریوں کے تحفظ کو یقینی بنانے کے لیے پنجاب پولیس اور ضلعی انتظامیہ نے ایک نیا اور سخت سکیورٹی نظام متعارف کروا دیا ہے، اس نئے ضابطہ اخلاق کا مقصد مسافروں، بالخصوص خواتین اور بچوں کے سفر کو محفوظ بنانا ہے۔ تفصیلات کے مطابق شہر میں بڑھتے ہوئے ٹریفک اور آن لائن سفری سہولیات کے پیشِ نظر انتظامیہ نے آن لائن ٹیکسی کمپنیوں کے لیے نئے سیکیورٹی ایس او پیز جاری کر دیئے ہیں، اب کسی بھی ڈرائیور کو پولیس ویریفیکیشن کے بغیر سروس فراہم کرنے کی اجازت نہیں ہوگی کیوں کہ نئے قانون کے تحت آن لائن ٹیکسی سروس فراہم کرنے والے ہر ڈرائیور کے لیے پولیس کریکٹر سرٹیفکیٹ حاصل کرنا لازمی ہوگا۔

(جاری ہے)

بتایا گیا ہے کہ کمپنیاں صرف ان ڈرائیورز کو رجسٹرڈ کر سکیں گی جن کا کوئی مجرمانہ ریکارڈ نہیں ہوگا، اگر کسی ڈرائیور کا مجرمانہ ریکارڈ سامنے آیا تو اس کا اکاؤنٹ فوری طور پر بلاک کر دیا جائے گا، اب تمام آن لائن ٹیکسی ڈرائیورز کا مکمل ڈیٹا پنجاب پولیس کے 'ای خدمت مرکز' اور متعلقہ تھانوں کے ڈیجیٹل سسٹم کے ساتھ منسلک ہوگا، ڈرائیور کا نام، پتہ، شناختی کارڈ نمبر اور گاڑی کی تفصیلات پولیس کے پاس محفوظ ہوں گی، کسی بھی ہنگامی صورتحال یا شکایت کی صورت میں پولیس فوری طور پر ڈرائیور تک پہنچ سکے گی۔

معلوم ہوا ہے کہ نئے قانون کے تحت اب صرف ان گاڑیوں کو آن لائن سروس میں شامل کیا جائے گا جو محکمہ ایکسائز سے کلیئر ہوں گی، گاڑیوں کی فٹنس اور رجسٹریشن کی تفصیلات بھی ایپ کے ساتھ ساتھ پولیس ریکارڈ میں بھی اپ ڈیٹ کرنا ہوں گی، حکام نے کمپنیوں کو پابند کیا ہے کہ وہ اپنی ایپس میں 'ایمرجنسی الرٹ' کے نظام کو مزید بہتر بنائیں جو براہ راست پولیس ہیلپ لائن 15 سے منسلک ہو، تاکہ کسی بھی ناخوشگوار واقعے کی صورت میں مسافر فوری مدد حاصل کر سکے۔

پولیس حکام کا کہنا ہے کہ یہ اقدامات حالیہ دنوں میں پیش آنے والے چند ناخوشگوار واقعات کے سدِباب کے لیے اٹھائے گئے ہیں، شہریوں کی جان و مال کا تحفظ ہماری اولین ترجیح ہے اور ڈیجیٹل دور میں سیکیورٹی کو بھی ڈیجیٹل بنیادوں پر استوار کرنا ضروری ہے، شہری سفر شروع کرنے سے پہلے ایپ پر موجود ڈرائیور کی تصویر اور گاڑی کا نمبر لازمی چیک کریں، مشکوک صورتحال میں فوری طور پر 15 پر اطلاع دیں۔