نو سال سے زیرِ التواکنگ سلمان ہسپتال کی تعمیر کا منصوبہ شروع کیا جا رہا ہے،وفاقی وزیرِ صحت

بدھ 6 مئی 2026 14:21

اسلام آباد (اُردو پوائنٹ اخبارتازہ ترین - اے پی پی۔ 06 مئی2026ء) وفاقی وزیر قومی صحت سید مصطفیٰ کمال نے کہا کہ گزشتہ 9 سال سے زیرِ التواکنگ سلمان ہسپتال کی تعمیر کا منصوبہ اب عملی طور پر شروع کیا جا رہا ہے۔ انہوں نے بتایا کہ سعودی گرانٹ سے تعمیر ہونے والے اس ہسپتال کے لیے بین الاقوامی سطح پر بولی (ٹینڈرنگ) کا عمل شروع کیا جائے گا۔ان خیالات کا اظہار کا انہوں نے کنگ سلمان ہسپتال منصوبے کی سائٹ کے دورہ کے دوران میڈیا سے گفتگو کرتے ہوئے کیا۔

انہوں نے منصوبے پر پیش رفت سے آگاہ کرتے ہوئے کہا کہ گزشتہ 9 سال سے زیرِ التوا کنگ سلمان ہسپتال کی تعمیر کا منصوبہ اب عملی طور پر شروع کیا جا رہا ہے۔ سعودی گرانٹ سے تعمیر ہونے والے اس ہسپتال کے لیے بین الاقوامی سطح پر بولی (ٹینڈرنگ) کا عمل شروع کیا جائے گا۔

(جاری ہے)

ابتدائی مرحلے میں تقریباً 7 ارب روپے کی لاگت سے 200 بیڈز پر مشتمل جدید ہسپتال تعمیر کیا جائے گا، جسے بعد ازاں توسیع دے کر 600 بیڈز تک بڑھایا جائے گا۔

منصوبے کی تعمیر کا باقاعدہ آغاز ماہ جولائی سے 24 گھنٹے کی بنیاد پر کیا جائے گا اور اسے مقررہ مدت سے قبل مکمل کرنے کی بھرپور کوشش کی جائے گی۔انہوں نے صحت کے شعبے میں جاری اصلاحات پر روشنی ڈالتے ہوئے کہا کہ گزشتہ ایک سال کے دوران اسلام آباد کے ہسپتالوں میں 380 بیڈز کا اضافہ کیا جا چکا ہے۔ جبکہ صحت سہولت پروگرام میں شامل 19 ہسپتالوں کو شامل کیا جائے تو مجموعی طور پر 6633 بیڈز کا اضافہ بنتا ہے۔

انہوں نے کہا کہ حفاظتی ٹیکہ جات پروگرام ایک ایسا مؤثر اقدام ہے جس کا مقصد عوام کو بیماریوں سے بچانا ہے۔ وزیرِ صحت نے آبادی میں تیزی سے اضافے پر تشویش کا اظہار کرتے ہوئے کہا کہ پاکستان کی آبادی میں ہر سال نیوزی لینڈ کی آبادی کے برابر اضافہ ہو رہا ہے، جس کے باعث صحت کے نظام پر دباؤ بڑھ رہا ہے۔