وفاقی حکومت کی جانب سے سانحہ حطار کے متاثرین میں امدادی چیکس کی تقسیم

بدھ 6 مئی 2026 19:40

ہری پور (اُردو پوائنٹ اخبارتازہ ترین - اے پی پی۔ 06 مئی2026ء) پاکستان مسلم لیگ (ن) کے مرکزی رہنماءکیپٹن(ر) محمد صفدر اعوان،رکن قومی اسمبلی NA18 ہری پور بابر نواز خان،سابق صوبائی وزیر قاضی محمد اسد خان،سابق تحصیل چیئرمین ہری پور سمیع اللہ‎ خان نے وفاقی حکومت کی جانب سے سانحہ حطار کے متاثرین میں امدادی رقم کے چیک تقسیم کیے۔ وفاقی حکومت کی جانب سے سانحہ میں جاں بحق افراد کے لیے فی کس 20 لاکھ روپے اور زخمیوں کے لیے 5 لاکھ روپے کے چیک دیے گئے۔

اس حوالے سے تقریب بدھ کے روز ڈپٹی کمشنر آفس ہری پور میں منعقد ہوئی جس میں اظہار خیال کرتے ہوئے کیپٹن محمد صفدر اعوان اور بابر نواز خان کا کہنا تھا کہ وزیر اعظم پاکستان میاں محمد شہباز شریف کی قیادت میں وفاقی حکومت نے سانحہ حطار کے متاثرین کو تنہا نہیں چھوڑا،حادثے کی رات سے متاثرین کے ساتھ ہر فورم پر موجود رہے ہیں۔

(جاری ہے)

وفاقی حکومت متاثرین کے خاندان کے ساتھ آئندہ بھی بچوں کی تعلیم سمیت ہر سطح پر بھرپور ساتھ دیتی رہے گی،رکن قومی اسمبلی بابر نواز خان نے امدادی رقم میں اضافہ کرنے پر وزیر اعظم اسلامی جمہوریہ پاکستان میاں محمد شہباز شریف کا خصوصی شکریہ ادا کیا۔

تقریب میں رکن صوبائی اسمبلی شازیہ خان جدون،صدر مسلم لیگ ن صاحبزادہ حامد شاہ،جنرل سیکرٹری قاضی سعید ایڈوکیٹ،تحصیل صدر سردار حفیظ احمد،جنرل سیکرٹری سفیر احمد خان،نیشنل ڈیزاسٹر مینجمنٹ اتھارٹی کے افسران،مسلم لیگ ن ضلع ہری پور کے عہدیداران،یوتھ ونگ،ویمن ونگ،صحافی برادری،سول سوسائٹی اور معززین و عمائدین کی کثیر تعداد موجود تھی۔ شرکا نے سانحہ حطار کے شہدا کے ایصال ثواب اور ملک و قوم کی سلامتی کے لیے دعا بھی کی۔