بجلی صارفین کے لیے بڑی خوشخبری، 63 ارب روپے سے زائد ریلیف کا امکان

بدھ 6 مئی 2026 17:59

اسلام آباد (اُردو پوائنٹ اخبارتازہ ترین - آن لائن۔ 06 مئی2026ء) مہنگی بجلی سے پریشان صارفین کے لیے بڑی خوشخبری سامنے آئی ہے، جہاں ملک بھر میں بجلی کے نرخوں میں نمایاں کمی کا امکان ظاہر کیا جا رہا ہے۔ تقسیم کار کمپنیوں (ڈسکوز) نے کیلنڈر سال 2026 کی پہلی سہ ماہی ایڈجسٹمنٹ کے تحت تقریباً 63 ارب 94 کروڑ روپے کے ریلیف کی درخواست نیپرا میں جمع کرا دی ہے۔

(جاری ہے)

درخواست کے مطابق جنوری سے مارچ کے دوران کیپسٹی چارجز کی مد میں 36 ارب 83 کروڑ 70 لاکھ روپے کی کمی ہوئی، جبکہ سسٹم استعمال چارجز اور مارکیٹ آپریشن فیس میں بھی 11 ارب 24 کروڑ روپے کی کمی ریکارڈ کی گئی ہے۔ مزید برآں انکریمنٹل یونٹس کی مد میں 23 ارب 51 کروڑ روپے کی کمی کی درخواست بھی شامل ہے۔ذرائع کے مطابق اس ریلیف کا اطلاق کے الیکٹرک سمیت ملک بھر کے بجلی صارفین پر ہو سکتا ہے، جس سے گھریلو اور کمرشل صارفین کو خاطر خواہ مالی ریلیف ملنے کی توقع ہے۔

نیپرانے اس درخواست کی سماعت 19 مئی کو مقرر کی ہے، جس کے بعد حتمی فیصلہ کیا جائے گا کہ صارفین کو کس حد تک ریلیف دیا جائے گا۔ماہرین کے مطابق اگر یہ ریلیف منظور ہو جاتا ہے تو یہ حالیہ عرصے میں بجلی کے بلوں میں کمی کی ایک اہم پیش رفت ہوگی اور عوام کو مہنگائی کے دباؤ میں کچھ حد تک سہارا مل سکے گا۔