مالی خانہ جنگی میں بگڑتی انسانی صورتحال پر اقوام متحدہ کو تشویش

اسلام آباد (اُردو پوائنٹ ۔ UN اردو۔ 06 مئی 2026ء) اقوام متحدہ کے دفتر برائے انسانی حقوق (او ایچ سی ایچ آر) نے خبردار کیا ہے کہ افریقی ملک مالی میں انسانی حقوق کی صورتحال تیزی سے بگڑ رہی ہے جہاں ملک بھر میں مسلح گروہوں کے منظم حملوں میں شہریوں کی بڑی تعداد ہلاک، بے گھر اور خوراک و امداد سے محروم ہو رہی ہے۔

مالی میں تشدد 25 اور 26 اپریل کو شروع ہوا جب ملک کی فوجی حکومت کے مخالف متعدد مذہبی انتہا پسند اور علیحدگی پسند گروہوں نے کئی شہروں اور قصبوں میں حملے کیے جن میں دارالحکومت بماکو بھی شامل ہے۔

ادارے کے ترجمان سیف ماگانگو نے بتایا ہے کہ حالیہ دنوں ملک کی سکیورٹی فورسز اور مسلح گروہوں بشمول ازاواد لبریشن فرنٹ اور القاعدہ سے منسلک جماعت نصرت الاسلام والمسلمین کے مابین جھڑپیں جاری ہیں جن کے شہریوں پر تباہ کن اثرات مرتب ہو رہے ہیں۔

(جاری ہے)

اقوام متحدہ کے سیکرٹری جنرل انتونیو گوتیرش اور ہائی کمشنر برائے انسانی حقوق وولکر ترک نے تمام فریقین پر زور دیا ہے کہ وہ بین الاقوامی قوانین کا احترام کریں اور شہریوں کے تحفظ کو یقینی بنائیں۔

حقوق کی سنگین پامالی

حملوں کے بعد انسانی حقوق کی سنگین خلاف ورزی کے الزامات بھی سامنے آئے ہیں جن میں ماورائے عدالت ہلاکتیں اور اغوا بھی شامل ہیں۔

حکام نے ان حملوں کی تحقیقات کا اعلان کیا ہے جبکہ 'او ایچ سی ایچ آر' نے زور دیا ہے کہ تحقیقات جامع ہوں اور ان میں انسانی حقوق کے بین الاقوامی قوانین خصوصاً شفاف عدالتی عمل کی مکمل پاسداری کی جائے۔

بڑھتا انسانی بحران

مالی میں انسانی حالات بھی بدترین صورت اختیار کرتے جا رہے ہیں۔ ملک کے بعض حصوں میں قحط کے خدشات بڑھ رہے ہیں۔ وسطی شہرموپتی میں مقامی حکام نے خبردار کیا ہے کہ مسلح گروہوں کی ناکہ بندی کے باعث خوراک کی شدید قلت پیدا ہو سکتی ہے۔ بماکو اور دیافارابے کو مبینہ طور پر شدت پسند جنگجوؤں نے محاصرے میں لے رکھا ہے جس سے ضروری اشیاء کی ترسیل متاثر ہو رہی ہے۔

ترجمان نے کہا ہے کہ ایسی ناکہ بندیاں شہریوں کے لیے ناقابل قبول نتائج کا باعث بنتی ہیں اور انہیں فوری طور پر ختم ہونا چاہیے۔ انہوں نے انسانی امداد کی محفوظ و بلا رکاوٹ رسائی کا مطالبہ بھی کیا ہے۔

تعلیمی اور طبی سہولیات پر حملے

اقوام متحدہ کے ادارہ برائے اطفال (یونیسف) نے کہا ہے کہ یہ بحران بچوں پر شدید اثرات مرتب کر رہا ہے۔

یونیسیف نے کہا ہے کہ سکول اور طبی مراکز بچوں کی محفوظ پناہ گاہیں ہونی چاہئیں اور انہیں کبھی نشانہ نہیں بنایا جانا چاہیے۔

اطلاعات کے مطابق، زخمیوں کی بڑھتی تعداد کے باعث طبی مراکز شدید دباؤ کا شکار ہیں۔

ریڈ کراس کی ٹیموں نے طبی مراکز کو ضروری سازوسامان کی فراہمی کے علاوہ جراحی کرنے والے عملے کو بھی مدد مہیا کی ہے جبکہ متاثرہ علاقوں میں ہسپتالوں کو کام جاری رکھنے کے لیے ایندھن بھی فراہم کیا جا رہا ہے۔