جیکب آباد میں خسرہ کی وبا سے صحافی کی معصوم بھتیجی انتقال کرگئی، کئی معصوم بچے مبتلا

ْ محکمہ صحت کی جانب سے خسرہ کی وبا کے خاتمے کے لیے کوئی موثر اقدامات نہیں کئے جارہے،شہری

جمعرات 7 مئی 2026 18:07

جیکب آباد (اُردو پوائنٹ اخبارتازہ ترین - این این آئی۔ 07 مئی2026ء) جیکب آباد میں خسرہ کی وبا سے صحافی کی معصوم بھتیجی انتقال کرگئی، کئی معصوم بچے مبتلا۔

(جاری ہے)

تفصیلات کے مطابق جیکب آباد ضلع میں خسرہ کی وبا تیزی سے پھیلنے لگی ہے ، خسرہ وبا کے باعث جیکب آباد کے صحافی برکت علی کھوکھر کی معصوم بھتیجی معصومہ زہرا کراچی کے ایک نجی اسپتال میں دوران علاج انتقال کر گئی ، جیکب آباد کے مختلف علاقوں میں متعدد بچے خسرہ میں مبتلا ہیں ، شہریوں نے کہا کہ محکمہ صحت کی جانب سے خسرہ کی وبا کے خاتمے کے لیے کوئی موثر اقدامات نہیں کئے جارہے جس کی وجہ سے معصوم بچے فوت ہورہے ہیں ، صحافی برکت کھوکھر کے مطابق معصوم بھتیجی 15روز تک زندگی اور موت کی کشمکش میں مبتلا رہی اور دوران علاج زندگی کی جنگ ہار گئی، انہوں نے کہا کہ محکمہ صحت کی جانب سے خسرہ کی وبا میں مبتلا بچوں کو علاج کی کوئی سہولت میسر نہیں جس کی وجہ سے بچے فوت ہورہے ہیں، شہریوں نے حکومت سندھ اور محکمہ صحت کے اعلیٰ حکام سے مطالبہ کیا ہے کہ فوری طور پر ہنگامی بنیادوں پر میڈیکل کیمپ قائم کیے جائیں، متاثرہ علاقوں میں ویکسینیشن مہم تیز کی جائے اور اسپتالوں میں بچوں کے علاج معالجے کی بہتر سہولیات فراہم کی جائیں تاکہ مزید قیمتی جانوں کے ضیاع کو روکا جاسکے۔