افواجِ پاکستان نے نظم و ضبط اور بھرپور حکمت عملی سے ہر جارحیت کا منہ توڑ جواب دیا، اظہر علی شاہ

ہفتہ 9 مئی 2026 16:53

لاہور(اُردو پوائنٹ اخبارتازہ ترین - این این آئی۔ 09 مئی2026ء) پاکستان سائیکلنگ فیڈریشن کے صدر سید اظہر علی شاہ نے آپریشن بنیان مرصوص کی کامیاب تکمیل پر خوشی اور اطمینان کا اظہار کرتے ہوئے کہا ہے کہ اللہ تعالیٰ کے فضل و کرم سے پاک افواج نے پاکستان کی خودمختاری اور سا لمیت کا بھرپور دفاع کرتے ہوئے دشمن کے ناپاک عزائم کو ہر محاذ پر ناکام بنایا۔

اپنے بیان میںانہوں نے کہا کہ پاک فوج، فضائیہ اور بحریہ کے بہادر جوانوں نے ایک بار پھر جرات، پیشہ ورانہ مہارت، اتحاد اور غیر متزلزل عزم کا عملی مظاہرہ کیا۔ انہوںنے کہاکہ افواجِ پاکستان نے شب و روز نظم و ضبط اور بھرپور حکمت عملی کے ساتھ کام کرتے ہوئے ہر جارحیت کا موثر اور منہ توڑ جواب دیا۔سید اظہر علی شاہ نے کہا کہ دشمن کے میزائل حملے اور مذموم منصوبے بری طرح ناکام ہوئے جبکہ پاکستان کی افواج نے طاقت، حکمت اور قومی جذبے کے ساتھ بھرپور ردعمل دیا۔

(جاری ہے)

پوری قوم اپنے محافظوں کی قربانیوں، کامیابیوں اور جذبہ خدمت پر فخر کرتی ہے۔انہوں نے ملکی قیادت، عسکری کمانڈ اور وزیراعظم کے کردار کو بھی سراہتے ہوئے کہا کہ قومی مفادات کا تحفظ کرتے ہوئے خطے میں استحکام برقرار رکھنا ایک بڑی کامیابی ہے۔انہوں نے کہا کہ پوری قوم اپنی بہادر افواج کے شانہ بشانہ کھڑی ہے۔