معرکہ حق وآپریشن بنیان المرصوص کا ایک سال مکمل ،پنجاب بھر میں سوشل ویلفیئر اداروں میں تقریبات،ریلیاںو سیمینارز

لاہور (اُردو پوائنٹ اخبارتازہ ترین - اے پی پی۔ 09 مئی2026ء) وزیراعلی پنجاب مریم نواز کے ویژن اور صوبائی وزیر سوشل ویلفیئر و بیت المال پنجاب سہیل شوکت بٹ کی ہدایات کی روشنی میں معرکہ حق اورآپریشن بنیان المرصوص کا ایک سال مکمل ہونے کے موقع پر صوبہ بھر میں محکمہ سوشل ویلفیئر و بیت المال پنجاب کے زیر اہتمام مختلف تقریبات، سیمینارز، ریلیوں، واکس اور آگاہی سرگرمیوں کا انعقاد کیا گیا، جن میں پاک افواج کی بہادری، قربانیوں اور قومی سلامتی کے لیے خدمات کو خراجِ تحسین پیش کیا گیا۔

اولڈ ایج ہوم ساہیوال میں رہائش پذیر بزرگ افراد اور ملازمین نے پاک فوج سے اظہارِ تشکر کرتے ہوئے یکجہتی واک کا انعقاد کیا جبکہ شیلٹر ہوم ساہیوال کے افسران و عملہ نے بھی معرکہ حق / آپریشن بنیان المرصوصریلی میں بھرپور شرکت کی۔

(جاری ہے)

اسی طرح شیلٹر ہوم خانیوال میں سیمینار اور واک کا اہتمام کیا گیا جس میں ملی نغموں، تقاریر اور رہائشیوں و عملے کی بھرپور شرکت نے قومی جذبے کو اجاگر کیا۔

صنعت زار خانیوال میںمعرکہ حق کے موضوع پر سیمینار منعقد ہوا جس میں افسران، عملے اور تربیت حاصل کرنے والی طالبات نے شرکت کی۔ مقررین نے پاک فوج کی قربانیوں کو خراجِ عقیدت پیش کرتے ہوئے قومی اتحاد، استحکام اور سچائی کی فتح کے پیغام کو اجاگر کیا۔ پروگرام کے اختتام پر واک بھی کی گئی جبکہ محکمہ سوشل ویلفیئر و بیت المال خانیوال کے دفاتر میں معرکہ حق سے متعلق بینرز اور سٹینڈیز بھی آویزاں کی گئیں۔

بھکر میں محکمہ سوشل ویلفیئر و بیت المال کی جانب سے معرکہ حق کے حوالے سے آگاہی مہم کے تحت مختلف مقامات اور دفاتر میں فلیکس آویزاں کیے گئے جبکہ صنعت زار بھکر میں آگاہی واک کا انعقاد بھی کیا گیا۔ خوشاب میں بھی محکمہ سوشل ویلفیئر و بیت المال کی مختلف عمارتوں پر چراغاں کیا گیا۔تحصیل چک جھمرہ، ضلع فیصل آباد میں بھارت کے خلاف معرکہ حق میں کامیابی پر ایک پرامن ریلی نکالی گئی جس میں این جی اوز، سول سوسائٹی اور شہریوں کی بڑی تعداد نے شرکت کی۔

شرکا نے پاک افواج کے ساتھ بھرپور یکجہتی کا اظہار کرتے ہوئے وطن عزیز کی سلامتی، خودمختاری اور استحکام کے لیے اپنے عزم کا اعادہ کیا۔میانوالی میں محکمہ سوشل ویلفیئر و بیت المال کے افسران و اہلکاروں نے ضلعی انتظامیہ کے زیر اہتمام بنیان المرصوص معرکہ حقریلی میں شرکت کی جبکہ دریا خان میں کمیونٹی ڈویلپمنٹ کے عملے نے بھی تقریب اور ریلی میں بھرپور شرکت کی۔

اس موقع پر پاکستان کے امن، استحکام اور خوشحالی کے لیے خصوصی دعائیں بھی کی گئیں۔ملتان میں سوسائٹی فار سپیشل پرسنز کی جانب سے پاک فوج سے اظہارِ یکجہتی اور معرکہ حق میں کامیابی پر خراجِ تحسین پیش کرنے کے لیے ریلی کا انعقاد کیا گیا۔ ریلی نواں شہر چوک سے شروع ہو کر پریس کلب ملتان پر اختتام پذیر ہوئی۔تقریبات کے شرکا نے اس عزم کا اعادہ کیا کہ پوری قوم اپنی بہادر افواج کے شانہ بشانہ کھڑی ہے اور پاکستان کی سلامتی، خودمختاری اور استحکام کے لیے ہر قربانی دینے کو تیار ہے۔