کراچی میں موٹر سائیکل چوری کی وارداتیں بے قابو، شہری شدید عدم تحفظ کا شکار ہیں، مہاجرقومی موومنٹ

چار ماہ میں 13ہزار 775موٹر سائیکلیں چوری یا چھینی گئیں، صرف 794بازیاب ہوسکیں، پولیس میں غیرمقامی افراد کی تعیناتی مسائل کی ایک بڑی وجہ ہے،شاہد فراز

اتوار 10 مئی 2026 12:20

کراچی(اُردو پوائنٹ اخبارتازہ ترین - این این آئی۔ 10 مئی2026ء) مہاجر قومی موومنٹ(پاکستان)کے جنرل سیکرٹری شاہد فراز نے کہا ہے کہ کراچی میں بڑھتی ہوئی اسٹریٹ کرائم اور خصوصا موٹر سائیکل چوری کی وارداتیں شہریوں کیلئے سنگین المیہ بن چکی ہیں۔ گزشتہ چار ماہ کے دوران شہر بھر سے 13 ہزار 775 موٹر سائیکلیں چوری یا چھینی گئیں جبکہ افسوسناک طور پر ان میں سے صرف 794موٹر سائیکلیں ہی بازیاب کی جا سکیں، جو قانون نافذ کرنے والے اداروں کی کارکردگی پر ایک بڑا سوالیہ نشان ہے۔

وہ مہاجر قومی موومنٹ(پاکستان)کے چیئرمین آفاق احمد کی رہائشگاہ پر ڈسٹرکٹ ایسٹ زون کے انچارجز اور عہدیداران سے ملاقات کے دوران گفتگو کر رہے تھے۔شاہد فراز نے کہا کہ یہ اعداد و شمار اس بات کی عکاسی کرتے ہیں کہ کراچی کے شہری اپنی جان و مال کے تحفظ کے حوالے سے شدید عدم تحفظ کا شکار ہیں۔

(جاری ہے)

موٹر سائیکل متوسط اور نچلے طبقے کی بنیادی ضرورت بن چکی ہے اور ہزاروں شہری روزگار، ملازمت، کاروبار اور گھریلو ضروریات کیلئے اس پر انحصار کرتے ہیں۔

ایسی صورتحال میں مسلسل چوری کی وارداتیں عوام کی معاشی کمر توڑنے کے ساتھ ساتھ ریاستی اداروں پر اعتماد کو بھی مجروح کر رہی ہیں۔انہوں نے الزام عائد کیا کہ کراچی پولیس میں غیرمقامی افراد کی تعیناتی بھی مسائل میں اضافے کا سبب بن رہی ہے، جبکہ شہری علاقوں کے مسائل کو سمجھنے اور ان پر قابو پانے کیلئے مقامی سطح پر مثر حکمت عملی کی ضرورت ہے۔

شاہد فراز نے کہا کہ ایسے پرآشوب حالات میں چیئرمین آفاق احمد واحد سیاسی آواز ہیں جو گزشتہ چار دہائیوں سے شہری علاقوں کے عوام کے مسائل، ناانصافیوں اور بدامنی کے خلاف جدوجہد کر رہے ہیں۔ انہوں نے کہا کہ آفاق احمد پر کسی قسم کی کرپشن یا مالی بے ضابطگی کا کوئی داغ نہیں اور وہ آج بھی عوامی حقوق کی جدوجہد میں ثابت قدم ہیں۔انہوں نے مزید کہا کہ وہ وقت دور نہیں جب کراچی کے مظلوم عوام چیئرمین آفاق احمد کی قیادت میں معاشرتی جرائم کے خاتمے کیلئے اپنی بھرپور آواز بلند کریں گے اور شہر کو جرائم سے پاک بنانے کیلئے مثر کردار ادا کریں گے۔