Live Updates

پنجاب حکومت نے اڈیالہ جیل ریڈ زون قرار دے دیا

15 روز کیلئے دفعہ 144 نافذ، جلسے، جلوس، دھرنے اور ریلیوں پر پابندی عائد کر دی گئی

محمد علی منگل 12 مئی 2026 00:31

راولپنڈی (اُردو پوائنٹ اخبارتازہ ترین۔ 11 مئی2026ء) پنجاب حکومت نے اڈیالہ جیل ریڈ زون قرار دے دیا 15 روز کیلئے دفعہ 144 نافذ، جلسے، جلوس، دھرنے اور ریلیوں پر پابندی عائد کر دی گئی۔ تفصیلات کے مطابق پنجاب حکومت کی راولپنڈی میں انتظامیہ نے دفعہ 144نافذ کرتے ہوئے اڈیالہ جیل اور حساس تنصیبات کے اطراف ہر قسم کے اجتماعات پر پابندی عائد کردی۔ جاری کیے گئے نوٹیفیکیشن کے مطابق ڈپٹی کمشنر راولپنڈی نے امن و امان کی صورتحال کے پیش نظر دفعہ 144نافذ کرتے ہوئے اڈیالہ جیل، ریڈ زون اور حساس تنصیبات کے اطراف جلسے، جلوس، دھرنے اور ریلیاں ممنوع قرار دے دیں۔

اجتماعات کے علاوہ اسلحہ، لاٹھیاں، پتھر، پٹرول بم اور دھماکا خیز مواد لے کر چلنے اور پولیس کی جانب سے لگائی گئی، رکاوٹیں ہٹانے یا ٹریفک میں خلل ڈالنے پر بھی پابندی عائد کی گئی ہے۔

(جاری ہے)

نوٹیفکیشن کے مطابق دفعہ 144، 5مئی سے 19مئی 2026 تک نافذ العمل رہے گی۔ حکام کا کہنا ہے کہ یہ اقدامات امن و امان برقرار رکھنے اور کسی بھی ناخوشگوار صورتحال سے نمٹنے کیلئے کیے گئے ہیں۔

سکیورٹی اداروں کو ہائی الرٹ کر دیا گیا ہے جبکہ مختلف داخلی و خارجی راستوں پر نگرانی مزید سخت کی جا رہی ہے۔ واضح رہے کہ پنجاب حکومت کا یہ اقدام بانی تحریک انصاف عمران خان سے ملاقات کے دن سے قبل اٹھایا گیا ہے۔ بانی تحریک انصاف عمران خان کی بہنیں اور کارکنان ہر ہفتے ملاقات کے ایام میں اڈیالہ جیل پہنچنتے ہیں، تاہم گزشتہ کئی ماہ سے بہنوں کو عمران خان سے ملاقات کی اجازت نہیں مل سکی۔ جبکہ اب پنجاب حکومت نے اڈیالہ جیل کے قریب شہریوں کےکسی بھی قسم کے اجتماع پر پابندی بھی عائد کر دی ہے۔