Live Updates

آبنائے ہرمز کی بندش نے گوادرپورٹ کو اہم ترین مقام دلا دیا، ہمیں اس پر جنگی بنیادوں پرکام کرنا ہوگا

ایران سے پابندیاں ختم ہوگئیں تو سب سے زیادہ فائدہ پاکستان کو ہوگا، پائپ لائن بچھنے سے پاکستان میں براہ راست ایرانی تیل دستیاب ہوگا، پاکستان ایران تجارت ہوسکے گی۔ وزیر دفاع خواجہ آصف

ثنااللہ ناگرہ پیر 11 مئی 2026 21:25

آبنائے ہرمز کی بندش نے گوادرپورٹ کو اہم ترین مقام دلا دیا، ہمیں اس پر ..

اسلام آباد (اردوپوائنٹ اخبار تازہ ترین۔ انٹرنیشنل پریس ایجنسی ۔ 11 مئی 2026ء ) وزیر دفاع خواجہ محمد آصف نے کہا ہے کہ آبنائے ہرمز کی بندش نے گوادرپورٹ کو اہم ترین مقام دلا دیا، ہمیں اس پر جنگی بنیادوں پرکام کرنا ہوگا، ایران سے پابندیاں ختم ہوگئیں تو سب سے زیادہ فائدہ پاکستان کو ہوگا۔ انہوں نے ہم نیوز کے پروگرام میں گفتگو کرتے ہوئے کہا کہ امریکا اور ایران کے درمیان جنگ بندی تو قائم ہے لیکن خطے میں پائیدار امن کیلئے پاکستان کا کردار بڑا مثالی ہے ، پاکستان کے امن کے کردار سے خطے اور مشرق وسطیٰ کے تمام ممالک کو فائدہ پہنچے گا اور امت مسلمہ جو اس خطے میں رہتی ہے سب سکھ کا سانس لیں گے۔

پاکستان ایران، امریکا مزاکرات میں بطور ثالث اہم ترین کردار ادا کر رہا ہے۔

(جاری ہے)

اس امن کا فائدہ جس کی کوشش پاکستان کر رہا ہے وہ گلف ممالک اور خطے اور پوری دنیا کو پہنچے گا۔ بھارت کے ساتھ میں اور حالیہ ایران امریکا امن کی کوششوں میں فیلڈ مارشل اور وزیراعظم کا کلیدی کردار ہے۔ ان دونوں افراد کی سرپرستی میں پاکستان بہترین سفر طے کر رہا ہے۔

خواجہ آصف نے کہا کہ دنیا اسرائیل کا بھیانک چہرہ پہچان چکی ہے، امریکا کا کردار اس میں واضح ہے۔۔ اس وقت جو امن کی کوششیں جاری ہیں وہ اسرائیل کے لیے قابل قبول نہیں۔ پاکستان اور سعودی عرب دفاعی معاہدے میں امکان ہے کہ ترکیے اور قطر بھی شامل ہو گا۔ مملکتوں کی آزاد حیثیت تو رہے گی مگر خطے کے ممالک امن کے تحفظ کے لیے جڑ رہے ہیں۔ امن کے لیے نیا پلیٹ فارم ضروری ہے۔

وزیردفاع خواجہ محمد آصف نے کہا کہ بھارت افغانستان کے ساتھ مل کر پاکستان کے خلاف پراکسی جنگ لڑ رہا ہے اور اور اس میں کابل حکومت شامل ہے۔ بھارت اور افغانستان پاکستان میں دہشت گردی کروا رہے ہیں۔۔ بھارت اب پاکستان کے خلاف براہ راست جنگ کا بڑا رسک نہیں لے گا۔ بہتر ہو گا کابل دہلی کی بولی نا بولے۔ وزیر دفاع خواجہ آصف نے کہا کہ آبنائے ہرمز کی بندش نے گوادر پورٹ کو اہم ترین مقام دلا دیا ہے۔

اب یہ ہم پر ہے کہ ہم اس کا کس انداز سے استعمال کر سکتے ہیں۔ ہمیں جنگی بنیادوں پر اس پر کام کرنا ہو گا۔ ایران سے پابندیاں ختم ہو گئیں تو سب سے زیادہ فائدہ پاکستان کو ہو گا۔ پائپ لائن بچھ گئی تو پاکستان میں براہ راست ایرانی تیل دستیاب ہو گا۔ پاکستان براہ راست ایران میں تجارت کر سکے گا۔