پاکستان برکس میں شمولیت کا خواہاں ہے، پاکستانی سفیر فیصل نیاز ترمذی

منگل 12 مئی 2026 12:04

ماسکو (اُردو پوائنٹ اخبارتازہ ترین - اے پی پی۔ 12 مئی2026ء) روس میں تعینات پاکستان کے سفیر فیصل نیاز ترمذی نے کہا ہے کہ پاکستان برکس کا مکمل رکن بننے اور اس حوالے سے گروپ کے اندر وسیع حمایت حاصل کرنے کا خواہاں ہے۔

(جاری ہے)

روسی خبر رساں ادارے تاس کے مطابق ایک انٹرویو کے دوران فیصل نیاز ترمذی نے کہا کہ پاکستان برکس کا ایک فطری شراکت دار ہے، صرف ایک ملک پاکستان کی برکس میں شمولیت کی مخالفت کرتا ہے، اس کے علاوہ کسی اور ملک کو پاکستان کے برکس میں شامل ہونے پر اعتراض نہیں ہے۔

انہوں نے کہا کہ پاکستان شنگھائی تعاون تنظیم (ایس سی او) کا رکن ہے اور بھارت بھی اس کا حصہ ہے لہٰذا پاکستان برکس کا بھی رکن بن سکتا ہے اور بننا چاہیے۔ انہوں نے کہا کہ بھارت کے علاوہ تمام ممالک نے پاکستان کو برکس کا رکن دیکھنے کی مضبوط خواہش ظاہر کی ہے، پاکستان کی برکس میں شمولیت تنظیم کے لیے بہت فائدہ مند ثابت ہوگی،روس،چین،جنوبی افریقہ اور برازیل پاکستان کی حمایت کرتے ہیں۔