خیبر پختونخوا اور قبائلی اضلاع کے عوام ملکی معیشت میں اہم کردار ادا کر رہے ہیں، گورنر خیبر پختونخوا

بدھ 13 مئی 2026 16:39

اسلام آباد (اُردو پوائنٹ اخبارتازہ ترین - اے پی پی۔ 13 مئی2026ء) گورنر خیبر پختونخوا فیصل کریم کنڈی نے کہا کہ خیبر پختونخوا اور قبائلی اضلاع کے عوام ملکی معیشت میں اہم کردار ادا کر رہے ہیں، حکومت کاروباری برادری کو سہولیات کی فراہمی، سرمایہ کاری کے فروغ اور معاشی استحکام کے لیے ہر ممکن تعاون جاری رکھے گی۔ گورنر آفس کی جانب سے جاری بیان کے مطابق ان خیالات کا اظہار انہوں نے ترنول میں پشتون کمیونٹی کے اجتماع سے خطاب کے دوران کیا۔

اجتماع سے قبائلی رہنما ملک عنایت محسود ، سابق مشیر وزیر اعلیٰ خیبرپختونخوا اجمل خان وزیر ، قبائلی سیاسی رہنماکفایت اللہ ، قبائلی رہنماانور خان سلیمان خیل نے بھی خطاب کیا۔ اجتماع میں خیبرپختونخوا کی پختون کمیونٹی کے سرکردہ افراد کی بڑی تعداد نے شرکت کی۔

(جاری ہے)

قبائلی تنظیموں کے قائدین نے خطاب کرتے ہوئے پشتون تاجروں، قبائلی عوام اور کاروباری طبقے کو درپیش مشکلات اور مسائل کو اجاگر کیا۔

گورنر فیصل کریم کنڈی نے کہا کہ پشتون بیلٹ میں امن بحال کرنے کے لیے پختونوں کو متحد ہوکر کام کرنا ہوگا میرا ہمیشہ یہی موقف رہا ہے کہ ہمارے خطہ میں امن کے لئے باہر سے کسی نے نہیں آنا ہمیں خود ہی اپنی نسلوں کے مستقبل کے لئے متحد ہونا ہوگا۔ انہوں نے کمیونٹی کے اتحاد کو سراہا اور کہا کہ پاکستان میں باہمی اتفاق رواداری کی فضا کا قیام اور تسلسل ضروری ہے ہمیں تشدد کے بجائے مذاکرات سے مسائل کے حل کی روش کو فروغ دینا ہوگا۔

سابق صوبائی مشیر اجمل وزیر نے خطاب کرتے ہوئےقبائلی اضلاع اور پشتون کاروباری برادری کے مسائل کے حل کے لیے مربوط حکومتی اقدامات کی ضرورت پر زور دیا۔ قبائلی عمائدین نے حالیہ دنوں میں پیش آنے والے ایک افسوسناک واقعے کے دوران گورنر کے تعاون، ہمدردی اور مثبت کردار پر ان کا شکریہ ادا کیا اور قبائلی عوام کے مسائل کے حل کے لیے ان کی کاوشوں کو سراہا۔