خواجہ سلمان رفیق کا دیگر کے ہمراہ نواز شریف انسٹی ٹیوٹ آف کینسر ٹریٹمنٹ اینڈ ریسرچ پر جاری پیش رفت کا جائزہ لینے کیلئے دورہ

لاہور (اُردو پوائنٹ اخبارتازہ ترین - این این آئی۔ 13 مئی2026ء) صوبائی وزیر صحت خواجہ سلمان رفیق، چیئرمین بورڈ و سابق چیف سیکرٹری پنجاب کیپٹن ریٹائرڈ زاہد سعید اور ہیلتھ اکانومسٹ ڈاکٹر محمد عدنان خان نے نواز شریف انسٹی ٹیوٹ آف کینسر ٹریٹمنٹ اینڈ ریسرچ پر جاری پیش رفت کا جائزہ لینے کیلئے دورہ کیا۔اس موقع پر وائس چانسلر کنگ ایڈورڈ میڈیکل یونیورسٹی پروفیسر ڈاکٹر محمود ایاز، ایڈیشنل سیکرٹری ٹیکنیکل ڈاکٹر حافظ محمد وسیم، سی ای او آئی ڈیپ کیپٹن ریٹائرڈ شاہ میر اقبال، پراجیکٹ ڈائریکٹر و دیگر افسران موجود تھے۔

خواجہ سلمان رفیق، کیپٹن ریٹائرڈ زاہد سعید اور ڈاکٹر محمد عدنان خان نے کینسر ہسپتال کی سائٹ پر جاری پیش رفت کا جائزہ لیا اور افسران سے بریفنگ لی۔

(جاری ہے)

صوبائی وزیر صحت خواجہ سلمان رفیق نے کہاکہ حکومت پنجاب لاہور میں تقریباً 75 ارب روپے کی لاگت سے 915 بستروں پر مشتمل اسٹیٹ آف دی آرٹ نواز شریف انسٹی ٹیوٹ آف کینسر ٹریٹمنٹ اینڈ ریسرچ بنا رہی ہے۔

وزیر اعلیٰ پنجاب مریم نواز شریف کینسر انسٹی ٹیوٹ پر جاری پیش رفت کو مسلسل خود مانیٹر کر رہی ہیں۔نواز شریف انسٹی ٹیوٹ آف کینسر ٹریٹمنٹ اینڈ ریسرچ پر دن رات کام جاری ہے۔ خواجہ سلمان رفیق نے کہاکہ نواز شریف انسٹی ٹیوٹ آف کینسر ٹریٹمنٹ اینڈ ریسرچ سنٹر پاکستان کا پہلا مکمل سرکاری کینسر ہسپتال ہوگا،اس کینسر ہسپتال میں کسی مریض کو علاج سے انکار نہیں کیا جائے گا، اس ہسپتال میں کینسر کے لیول تھری اور لیول فور مریضوں کا بھی انشاء اللہ مفت علاج ہوگا۔

صوبائی وزیر صحت نے کہاکہ کینسر انسٹی ٹیوٹ میں پیڈڑ انکالوجی، آپریشن تھیٹرز، 10 ریڈی ایشن تھراپی بنکر، آئی سی یو اور 30 بیڈز کا ایمرجنسی وارڈ بنے گا، ویٹنگ ہال اور 24 بیڈز کے ساتھ تیمار داروں کے قیام گاہ بھی بنے گی،مرکزی عمارت میں بون میرو سینٹر، کینسر کیئر کلینک، ڈاکٹرز کیلئے رہائش گاہیں اور مسجد پہلے مرحلے میں تعمیر ہو گی،دوسرے مرحلے میں 300 بستروں پر مشتمل نئی بلڈنگ اور پارکنگ پلازہ بھی بنے گا، پہلے سرکاری کینسر ہسپتال میں ریڈی ایشین تھراپی، کیمو تھراپی، اینڈوسکوپی و دیگر سہولتیں میسر ہوں گی،اس پہلے سرکاری کینسر ہسپتال میں کے پی کے، سندھ اور دیگر صوبوں سے آنے والے مریضوں کا بھی مفت علاج ہوگا۔

خواجہ سلمان رفیق نے کہاکہ نواز شریف کینسر ہسپتال پنجاب ہی نہیں بلکہ پورے پاکستان کا منصوبہ ہے،کینسر کا علاج غریب اور متوسط کیا امیر آدمی کے بس کی بات بھی نہیں، جمع پونجی لٹ جاتی ہے۔چیئرمین بورڈ کیپٹن ریٹائرڈ زاہد سعید نے کہاکہ کینسر ہسپتال کے پہلے فیز کو جلد مکمل کرنے کی کوشش کی جا رہی ہے۔نواز شریف انسٹی ٹیوٹ آف کینسر ٹریٹمنٹ اینڈ ریسرچ پر جاری پیش رفت کا مسلسل جائزہ لیا جا رہا ہے۔ہیلتھ اکانومسٹ ڈاکٹر محمد عدنان خان نے کہاکہ آئی ڈیپ کو نواز شریف انسٹی ٹیوٹ آف کینسر ٹریٹمنٹ اینڈ ریسرچ پراجیکٹ کو مقررہ وقت پر فنکشنل کرنے کی ہدایت کی ہے۔اس اپنی نوعیت کے منفرد کینسر ہسپتال میں کینسر کے ہزاروں مریضوں کو بین الاقوامی سطح کی طبی سہولیات میسر آئیں گی۔