وزیر ریلوے کا شہید گینگ میٹ کے لیے بعد از شہادت ستارۂ شجاعت کی منظوری پر صدر مملکت اور وزیر اعظم سے اظہار تشکر

بدھ 13 مئی 2026 16:34

اسلام آباد (اُردو پوائنٹ اخبارتازہ ترین - اے پی پی۔ 13 مئی2026ء) وفاقی وزیر برائے ریلوے محمد حنیف عباسی نے وزیرِاعظم محمد شہباز شریف اور صدرِ مملکت آصف علی زرداری کی جانب سے ریلوے کے شہید گینگ میٹ لیاقت علی کے لیے بعد از شہادت “ستارۂ شجاعت” کی منظوری پر گہرے اطمینان اور تشکر کا اظہار کیا ہے۔بدھ کو وزارتِ ریلوے سے جاری بیان میں وفاقی وزیر حنیف عباسی نے صدرِ مملکت اور وزیرِاعظم کا تہہ دل سے شکریہ ادا کرتے ہوئے اس فیصلے کو شہدا کے لیے بڑا قومی اعزاز قرار دیا۔

(جاری ہے)

انہوں نے کہا کہ یہ فیصلہ شہید لیاقت علی کی دہشتگردی کے خلاف بے مثال قربانی، جرات اور فرض شناسی کے اعتراف میں کیا گیا ،ایسے فیصلے نہ صرف شہدا کے خاندانوں کے لیے باعثِ تسلی ہوتے ہیں بلکہ قوم کو یکجہتی، قربانی اور حب الوطنی کا پیغام بھی دیتے ہیں۔ وفاقی وزیر نے کہا کہ شہید لیاقت علی کی قربانی پوری قوم کے لیے فخر، حوصلے اور عزم کی علامت ہے۔ ادھر،پاکستان ریلوے نے اپنے بیان میں کہا ہے کہ ادارہ اپنے شہدا کی عظیم قربانیوں کو ہمیشہ یاد رکھے گا اور ان کے اہلِ خانہ کے ساتھ ہر مشکل گھڑی میں کھڑا رہے گا۔\932