Live Updates

مرکزی مسلم لیگ کا مہنگائی کے خلاف تحریک کا اعلان ، اتوار کو احتجاجی مظاہرے کیے جائیں گے

جمعرات 14 مئی 2026 22:26

کراچی(اُردو پوائنٹ اخبارتازہ ترین - این این آئی۔ 14 مئی2026ء) پاکستان مرکزی مسلم لیگ کراچی کے رہنمائوں نے صوبائی سیکرٹریٹ میں پریس کانفرنس کرتے ہوئے ملک میں بڑھتی ہوئی مہنگائی کو عوام کے لیے سب سے بڑا مسئلہ قرار دیتے ہوئے اس کے خلاف ملک گیر تحریک شروع کرنے کا اعلان کردیا۔ سندھ کے صدر فیصل ندیم نے کراچی کے صدر ندیم اعوان کے ہمراہ میڈیا سے گفتگو کرتے ہوئے کہا کہ مہنگائی نے عوام کی زندگی اجیرن بنا دی ہے اور حکومت عوام کو ریلیف دینے میں مکمل طور پر ناکام ہو چکی ہے۔

انہوں نے کہا کہ بجلی، پیٹرول اور اشیائے ضروریہ کی قیمتوں میں مسلسل اضافے نے عوام کی کمر توڑ دی ہے، جبکہ ٹیکسوں کے بوجھ نے عام آدمی کو شدید مشکلات سے دوچار کر دیا ہے۔ ایف بی آر کی ناکامی کا بوجھ بھی عوام پر ڈال دیا گیا ہے اور مطلوبہ ٹیکس ہدف پورا نہ ہونے پر پیٹرول لیوی بڑھا کر عوام کی جیبوں پر مزید بوجھ ڈالا جا رہا ہے۔

(جاری ہے)

رہنماں نے اعلان کیا کہ مرکزی مسلم لیگ اتوار کے روز ملک بھر میں مہنگائی کے خلاف احتجاجی مظاہرے کرے گی، جبکہ اس تحریک کو مزید منظم اور مثر بنانے کے لیے کاروباری برادری کو بھی ساتھ ملا کر ایک اہم سیمینار منعقد کیا جائے گا تاکہ معاشی مسائل کے حل پر سنجیدہ گفتگو کی جا سکے۔

انہوں نے مزید کہا کہ عید کے بعد اورنگی سے کورنگی تک کراچی کے حقوق کے لیے ایک بڑا مارچ بھی کیا جائے گا۔ انہوں نے کہا کہ جب تک عوام کو ریلیف نہیں ملتا، مرکزی مسلم لیگ مہنگائی کے خلاف اپنی جدوجہد جاری رکھے گی۔پریس کانفرنس سے خطاب کرتے ہوئے رہنماں نے کہا کہ موجودہ معاشی صورتحال میں عوام شدید دبا کا شکار ہیں اور ملک کو اس وقت "معرکہ معیشت" کی ضرورت ہے تاکہ پاکستان کو معاشی طور پر مستحکم کیا جا سکے۔ انہوں نے خبردار کیا کہ اگر عوام کو جان و مال کا تحفظ اور معاشی استحکام فراہم نہ کیا گیا تو سرمایہ کاری متاثر ہوگی اور ملکی معیشت مزید مشکلات کا شکار ہو سکتی ہے۔