ضلع نیلم کی اکیسویں سالگرہ قومی جوش و خروش، عقیدت اور بھرپور جذبہ حب الوطنی کے ساتھ منائی گئی

نیلم (اُردو پوائنٹ اخبارتازہ ترین - این این آئی۔ 15 مئی2026ء) ضلع نیلم کی اکیسویں سالگرہ قومی جوش و خروش، عقیدت اور بھرپور جذبہ حب الوطنی کے ساتھ منائی گئی۔ جشن نیلم کی مرکزی تقریب ضلعی انتظامیہ اور آرگنائزنگ کمیٹی کے زیرِ اہتمام پاک فوج، پولیس، مختلف سرکاری محکموں، سماجی تنظیموں اور عوامی تعاون سے شاندار انداز میں منعقد ہوئی، جس میں انسپکٹر جنرل پولیس آزاد کشمیر کیپٹن (ر) لیاقت علی ملک،کمشنر مظفرآباد ڈویژن بدر منیر ودیگر نے شرکت کی۔

تقریب کے آغاز میں پرچم کشائی کی گئی۔ جشن نیلم کی رنگا رنگ تقریب میں مقامی فنکاروں اور لوکل سنگرز نے نیلم کی ثقافت، روایات اور قومی جذبے کو اجاگر کرتے ہوئے اپنے فن کا شاندار مظاہرہ کیا۔ اس موقع پر مختلف سرکاری محکموں کی جانب سے معلوماتی و نمائشی سٹالز بھی قائم کیے گئے۔

(جاری ہے)

محکمہ سیاحت و آثارِ قدیمہ نے سیاحتی مقامات سے متعلق پمفلٹس تقسیم کیے جبکہ محکمہ زراعت نے جدید زرعی بیجوں اور آگاہی مواد کی نمائش کی۔

محکمہ لائیو سٹاک، دراوہ میوزیم، محکمہ سول ڈیفنس اور ڈسٹرکٹ ڈیزاسٹر مینجمنٹ اتھارٹی نے بھی خصوصی سٹالز لگائے۔ ڈی ڈی ایم اے اور سول ڈیفنس کی جانب سے ریسکیو آپریشن کا عملی مظاہرہ تقریب کا مرکزِ نگاہ بنا رہا۔تقریب کے دوران ضلع نیلم کے قیام اور تعمیر و ترقی میں کردار ادا کرنے والی شخصیات کو خراجِ تحسین پیش کیا گیا، جن میں سابق صدر پاکستان جنرل پرویز مشرف، سابق وزیراعظم آزاد کشمیر سکندر حیات خان اور سابق وزیر حکومت مفتی منصور الرحمٰن شامل تھے۔

انسپکٹر جنرل پولیس آزاد کشمیر ڈاکٹر ملک لیاقت نے خطاب کرتے ہوئے کہا کہ عوام اور پولیس جوانوں کے لیے ان کے دروازے ہمیشہ کھلے ہیں۔ انہوں نے کہا کہ لائن آف کنٹرول پر واقع وادی نیلم شہداء اور غازیوں کی سرزمین ہے اور یہاں کے عوام نے یوم نیلم انتہائی عزت، وقار اور قومی جذبے کے ساتھ منا کر زندہ دل قوم ہونے کا ثبوت دیا ہے۔ انہوں نے وادی نیلم کے عوام کی بہادری، قربانیوں اور حب الوطنی کو زبردست خراجِ تحسین پیش کیا۔

کمشنر مظفرآباد ڈویژن بدر منیر نے اپنے خطاب میں کہا کہ اہلِ نیلم ذہین، باوقار اور بہادر قوم ہیں۔ وادی نیلم جغرافیائی اعتبار سے ایک ہارڈ ایریا ہے، تاہم انتظامیہ عوامی مسائل کے حل اور ترقیاتی امور میں ہر ممکن تعاون جاری رکھے گی۔ انہوں نے یوم نیلم کی شاندار تقریب کے انعقاد پر آرگنائزنگ کمیٹی اور ضلعی انتظامیہ کو مبارکباد دیتے ہوئے کہا کہ شہداء کو خراجِ عقیدت پیش کرنے کا یہ بہترین انداز ہے۔

تقریب میں ڈی آئی جی شیریار، سیاسی و سماجی شخصیات، ضلعی آفیسران، وکلاء، صحافیوں، تاجروں، طلبہ و طالبات، سول سوسائٹی اور عوام کی بڑی تعداد نے شرکت کی۔ آرگنائزنگ کمیٹی کے ممبران(ر) پرنسپل مفتی خالد،سابق ایڈمنسٹریٹر ضلع کونسل نیلم ملک نواز اعوان، اسسٹنٹ ڈائریکٹر بی آئی ایس پی محمد نواز ناصر اور سی ایس پی کے ضلعی کوآرڈینیٹر خواجہ لشکر حسین آزاد تقریب کے انعقاد میں خصوصی طور پر متحرک رہے۔تقریب کے اختتام پر آرگنائزنگ کمیٹی کی جانب سے مختلف محکموں اور اداروں کو بہترین تعاون اور شاندار انتظامات پر یادگاری شیلڈز پیش کی گئیں، جبکہ مہمانوں نے مختلف سٹالز کا معائنہ بھی کیا۔