Live Updates

امریکا کے پھر ایران پر حملے، دفاعی تنصیبات، ڈورن ذخیرہ گاہوں کو نشانہ بنایا

امریکی حملوں کے بعد ایران کا جوابی وار، کویت اور بحرین میں امریکی فوجی تنصیبات پر حملے

اتوار 28 جون 2026 16:00

واشنگٹن/تہران (اُردو پوائنٹ اخبارتازہ ترین - این این آئی۔ 28 جون2026ء) امریکا نے ایران پر پھر حملہ کر دیا، امریکی سینٹرل کمانڈ نے کہا ہے کہ آبنائے ہرمز میں پانامہ کے پرچم بر دار ٹینکر جہاز پر ایرانی ڈرون حملے کے جواب میں ایران میں متعدد فوجی اہداف پر فضائی کارروائی کی ہے۔پاسدارانِ انقلاب نے کویت اور بحرین میں امریکی فوجی تنصیبات کو نشانہ بنایا ہے۔

بیان کے مطابق ایرانی بحریہ اور فضائیہ نے کویت میں امریکی علی السالم ایئربیس اور بحرین کے دارالحکومت منامہ کی پورٹ سلمان میں قائم امریکی ففتھ نیول فلیٹ پر بیلسٹک میزائلوں اور ڈرونز سے حملے کیے۔آئی آر جی سی کے مطابق یہ کارروائیاں ایران کے پانچ ساحلی مقامات پر امریکی بمباری کے جواب میں کی گئی ہیں۔ایران کی پاسدارانِ انقلاب نے امریکا کے ساتھ حالیہ کشیدگی کے بعد سخت ردعمل دیتے ہوئے خبردار کیا کہ خطے میں موجود امریکی فوجی اڈے آنے والے دنوں میں جہنم کا سامنا کریں گے۔

(جاری ہے)

پاسدارانِ انقلاب کی بحریہ کے جاری کردہ بیان میں کہا گیا کہ جنوبی ایرانی شہر سیریک پر امریکی حملہ آبنائے ہرمز پر ایران کی برتری کو ختم نہیں کر سکتا، ہرمز میں بحری آمدورفت کے ضوابط کے تحت خلاف ورزی کرنے والے جہازوں کے خلاف مزید سخت کارروائی کی جائے گی۔آئی آر جی سی نے کہا کہ امریکا اور ایران کے عبوری معاہدے کے مطابق آبنائے ہرمز میں بحری ٹریفک کی نگرانی اور کنٹرول ایران کے اختیار میں ہے اور اب سے قواعد کی خلاف ورزی کرنے والے بحری جہازوں کے ساتھ پہلے سے زیادہ سختی سے نمٹا جائے گا۔

بیان میں مزید خبردار کیا گیا کہ کسی بھی بہانے سے ہونے والی دشمن کی جارحیت کا فیصلہ کن اور منہ توڑ جواب دیا جائے گا۔ایران کا کہنا تھا کہ جنگ بندی کی خلاف ورزی مفاہمتی یادداشت کی خلاف ورزی ہے، جس کے نتیجے میں معاہدے کے تحت جاری تمام عمل مکمل طور پر روک دیے جائیں گے۔