پیپلزپارٹی سندھ کا5 جولائی کو صوبہ بھر میں یومِ سیاہ منانے کا اعلان

آئین اور پارلیمنٹ کی بالادستی ہی پاکستان کی ترقی، استحکام اور عوامی خوشحالی کی ضمانت ہے،نثار کھوڑو

جمعرات 2 جولائی 2026 17:01

کراچی (اُردو پوائنٹ اخبارتازہ ترین - این این آئی۔ 02 جولائی2026ء) پاکستان پیپلز پارٹی سندھ کے صدر نثار کھوڑو نے 5 جولائی 1977 کو جمہوریت پر لگائے گئے شب خون کی یاد میں 5 جولائی کو سندھ بھر میں یومِ سیاہ منانے کا اعلان کردیا ہے۔ اس موقع پر صوبے کے تمام ضلعی ہیڈکوارٹرز میں ریلیاں نکالی جائیں گی جبکہ پاکستان پیپلز پارٹی کے تمام ضلعی دفاتر پر سیاہ پرچم بھی لہرائے جائیں گے۔

نثار کھوڑو نے کہا کہ 5 جولائی 1977 کو جنرل ضیا الحق نے منتخب جمہوری حکومت کا تختہ الٹ کر آمریت مسلط کی، جس سے ملک کے جمہوری سفر کو شدید نقصان پہنچا۔ انہوں نے کہا کہ پاکستان پیپلز پارٹی اس دن کو جمہوریت کے خلاف سازش کی علامت کے طور پر ہر سال یومِ سیاہ کے طور پر مناتی ہے تاکہ عوام کو جمہوری اقدار کی اہمیت سے آگاہ رکھا جا سکے۔

(جاری ہے)

انہوں نے ہدایت کی کہ پارٹی کی تمام ضلعی تنظیمیں اپنے اپنے اضلاع میں یومِ سیاہ کے موقع پر ریلیوں اور دیگر تقریبات کا انعقاد کریں اور جمہوریت کے استحکام کے عزم کا اعادہ کریں۔

نثار کھوڑو نے کہا کہ ملک کو درپیش تمام مسائل کا حل جمہوریت کے تسلسل، پارلیمنٹ کی بالادستی اور آئین پر مکمل عملدرآمد میں مضمر ہے۔ انہوں نے کہا کہ پاکستان پیپلز پارٹی نے ہمیشہ آئین اور جمہوری اداروں کے استحکام کے لیے جدوجہد کی ہے۔انہوں نے کہا کہ اٹھارویں آئینی ترمیم کے ذریعے آئین کی شق 58بی2 کا خاتمہ کرکے منتخب جمہوری حکومتوں کو غیر آئینی طور پر برطرف کرنے کا راستہ ہمیشہ کے لیے بند کردیا گیا۔

ان کا کہنا تھا کہ آئین کو اس کی اصل روح کے مطابق بحال کرنے، اٹھارویں ترمیم منظور کرانے کا کریڈٹ پارلیمنٹ اور صدر آصف علی زرداری کو جاتا ہے۔نثار کھوڑو نے مزید کہا کہ اٹھارویں ترمیم کے تحت آئین توڑنے والوں کو آرٹیکل 6 کے تحت سنگین جرم کا مرتکب قرار دیا گیا ہے، جبکہ ماضی میں رات کی تاریکی میں منتخب جمہوری حکومتوں کو برطرف کرکے آمریت مسلط کردی جاتی تھی۔انہوں نے اس بات پر زور دیا کہ ملک میں جمہوریت کے مزید استحکام کے لیے ضروری ہے کہ تمام ریاستی ادارے اپنے اپنے آئینی دائرہ اختیار میں رہ کر فرائض انجام دیں، کیونکہ آئین اور پارلیمنٹ کی بالادستی ہی پاکستان کی ترقی، استحکام اور عوامی خوشحالی کی ضمانت ہے۔